Shillong, Naitung 10 : Ka Sorkar Jylla ha ka sngi Balang kala shim rai halor ka jingbuh dor ia ka bai jaka ban aiwai ha New Shillong Township (NST) Phase-II bad ka thain Mawkhanu.
“Ka jingthmu hi ka long ba ngi la buh katto katne ki jaka ia ngi bad katto katne ki jaka kibym pat pyndonkam mynta, ka Sorkar kala rai ia ka jingbuh dor ban aiwai sha kiwei ki Tnad Sorkar bad ki tnad ka Sorkar Pdeng bad ki Ophis ki riew shimet, kiba kwah ban wan seng Ophis khnang ba ngin lah ban lah pynmih pisa” ong u Myntri Rangbah ka Jylla Conrad K Sangma haba iakren bad ki nongthoh khubor hadien ka jingialang jong ka Kynhun Myntri.
Haba pynpaw baka Sorkar kala don ia katto katne ki nongkynshew kam, u Conrad ula ong “Mynta da ka jingkiew ka dor bai jaka, ngi sngew b aka biang eh ba ngi buh da ka policy bad buh dor ia ka bai jaka bad halor kane ngin sa lah ban ai jaka sha ki Agency bapher bapher. Ki dor bala buh ruh ki iapher na ka bynta ka Sorkar Jylla, ka Sorkar Pdeng bad ki riew shimet”.
Ka kynhun Myntri kala mynjur ruh ia ka jingtyrwa ban pyntreikam ia ka skhim ka Sorkar Pdeng ban ai jingkyrshan song pisa sha ki koidi ba duk, kiba don ha kylleng ki phatok ka Jylla.
U Conrad ula pyntip ba kane ka skhim ka dei jong ka Sorkar Pdeng bad ka Sorkar Jylla ka dei ban pyntreikam ia ka khlem da pynlut shi naia ruh.
“Ka jingthmu hi ka long ban iarap ia kito ki koidi ba duk, kiba dang don ha phatok bad bym don pisa ba kin lah ban iakhun bah jamin, ne iasaid ia ki case jong ki khnang ba kin ioh ban mih noh na phatok bad im laitluid” ula ong.
 Phase-II bad ka thain Mawkhanu.){kind=link}