Shillong, Nailar 25 : Ka Sorkar Meghalaya Democratic Alliance-II ba ialam da ka National People’s Party (NPP) ha ka sngi Nyngkong, kala shim ia ka rai ban pynsiew hi noh ia ka tulop jong ki nongtrei ki lai tylli ki Autonomous District Council-ka KHADC, JHADC bad GHADC naduh ka 1 tarik u bnai Naiwieng mynta u snem.
Ia kane la pyntip da u Myntri Rangbah ka Jylla Conrad K Sangma hadien ka jingiakren kaba bniah bad ki Nongialam ka Garo Hills Autonomous District Council (GHADC) lem bad u Lat ka Jylla.
Kat kum ka jingong jong u, ka Sorkar kala shim ia kane ka rai halor ka jingshem ba ki District Council ki shem jingeh ban siew ia ki tulop ki nongtrei namar ka jingduna ki jingpynmih pisa. “Ka GHADC ba donkam ha ka shisnem ka kot palat T.70 klur shisnem katba ka jingpynmih pisa kam pat kot wat tang T.30 klur. Ka don ka jingduna kaba bun hapdeng ka jingpynmih pisa bad ka jingpynlut. Kane ka long kumjuh ruh ha kiwei ki ADC kum ka JHADC bad katto katne ha KHADC”.
U Conrad ula ong ba ki ADC ki dei ki bor treikam kiba kongsan bha hapoh ka Jylla bad ki District Council ki dei ka dak jong ka kolshor bad ki jingleh tynrai.
“Kumta ka long kaba donkam ia ka Sorkar Jylla ban pynthikna ba ym tang ba ki ADC kin treikam bha hynrei kin ieng rasong ruh ban pynthikna ia ka jingkhmih bha ia baroh ki bynta jong ki jingleh tynrai, ka kolshor bad ka rukom bat khyndew” ong u Conrad.
U ong ba halor kine kiei kiei, ka Sorkar kala rai ba naduh ka 1 tarik Naiwieng, 2025, ka Sorkar Meghalaya kan sa siew noh ia ka tulop na ka bynta ki District Council bapher bapher ka Jylla.
“Kane kan dei ka khyllipmat ban sah jingkynmaw namar shisien bala siew ia ka tulop, ki ADC kin lah ban pynleit jingmut sha kiwei pat ki kam ba kongsan, ka roi ka par bad ki kam ba iadei bad ka kolshor bad ki jingleh tynrai” ula ong.
U Myntri Rangbah ula pyntip ruh ba khnang ban pynthikna ia ka jingpyntreikam bha ia kane ka rai, ka Sorkar kan sa thaw ia ka Committee, ka ban iakren bad baroh ki District Council.
“Ka Committee kan shim 45 sngi ia ka por ban pynthikna ba kan iakren bad baroh ki District Council bad ban wanrah ia ka rukom treikam kaba paka, khnang ban lah siew ia ka tulop sha ki ADC da ka Sorkar Jylla” ula ong.
U Myntri Rangbah ula kren ruh da ka jingsngew skhem da kaba ong “Nga kwah ruh ban kular ia ki District Council bad ki Nongshongshnong ba kan nym don satia kano kano ka jingtuklar ia ki jingtreikam ba manka sngi lane ia u pud u sam jong ki District Council.
“Ka jingthmu jong ngi ka long beit thik tang ban wanrah ia ka jinglong shngain ha ka pisa tyngka ki ADC bad ka rukom treikam kaba biang khnang ba kin lah ban siew ia ka tulop ki nongtrei ha ka pork aba dei bad ba kin lah ban bteng ia ki jingtreikam bad trei kat kum ka rukom bala buh da ka Riti Synshar ka Ri” ula ong.
Ha kajuh ka por, u Conrad u pyntip ba ula iakynduh ruh ia u Lat ka Jylla bad pynsngew ia kine ki rai bala shim. “Nga la shim ia ki jingpyni lynti na u bad kat kum ka jingbthah jong u, ia kine ki rai yn sa pynskhem da ka jingialang jong ka Kynhun Myntri ka ban long lashai ka sngi” ula ong.
 ha ka sngi Nyngkong, kala shim ia ka rai ban pynsiew hi noh ia ka tulop jong ki nongtrei ki lai tylli ki Autonomous District Council-ka KHADC, JHADC bad GHADC naduh ka 1 tarik u bnai Naiwieng mynta u snem.){kind=link}