Shillong, Naiwieng 26 : Ban pynbeit syndon ia ki kynrum kynram bala neh lah slem bah, u Myntri Rangbah ka Jylla Conrad K Sangma ha ka sngi Balang, ula pynbna ia ka rai jong ka sorkar ba kan ai jingithuh noh ia ka jingkyntur pud ha ki jaka ka tnad GAD ha Tura, da kaba shu shim bai wai ia ki briew ba sah ha kane ka jaka.
Ia kane ka rai la shim ban lah pynbeit noh ia ka jingsah beain bala iaid la 30-50 snem, ka jingiakhun ia ki mukotduma bad ki drama ba mih na ki jingleit kyndang ia kine ki iing.
Haba iakren bad ki nongpathai khubor hadien ba la wai ka jingialang jong ka Kynhun Myntri kaba long ha Nan Polok, u Conrad ula ong, “Ki don ki jaka jong ka sorkar kiba la shah kyntur pud ha ki riewshimet ha ki 30-50 snem kiba la leit bad ha kiba bun ki jingjia, kila don bun ki jingmudui da ka mukotduma kiba la iaid shakhmat bad ha kiba bun ki por, kala don ruh ka jingphah da ki notis ban kyndang noh, kaba la pynmih ia kiba bun ki jingeh bad kaba ktah ruh ia ka shongsuk shongshngain. Kumta da kaba iaid lang da kajuh ka polisi treikam kaba ngi leh ha Williamnagar ha ki 3 snem kiba la dep, ka Kynhun Myntri mynta ka sngi kala mynjur ia ka jingtyrwa jongka GAD ban iapynbeit noh ia kitei ki jaka kiba la shah kyntur pud. Kumta kane kan dei da ka Lease ne jingaiwai kaba bun snem ia ki briew kiba sah ha katei ka jaka”.
Ula batai ba katei ka jaka kan dei ka jaka jong ka Tnad Revenue.
“Kin don ki kyndon kiba hap ban bud ryntih bad kat kum kitei ki kyndon, (ki jaka kiba la shah kyntur pud) yn sa pynbeit ryntih noh ha kawei ka lynti, yn sa pynbeit noh khnang ba ha ki snem ban wan, kan ym pynmih shuh ia ki jingeh bad kan ym don shuh ruh ka jingjia kaba ka sorkar ne ki paitbah kin hap ban mad” ong u Myntri Rangbah haba pynbna ba ka wat ka ba nyngkong kan sa sdang noh mardor.
