Shillong, Risaw 31 : Ka Sorkar Jylla ha ka sngi Ba-ar, kala mynjur ban pynkylla thymmai ia ki kyndon ka Meghalaya Execuse Amendment Rules, 2021 ha kaban pyniabynta thymmai biang (re-classified) ia ki Brand jong ki kyiad khnang ban pynthikna ba ka Tnad Excise kan ioh lum khajna bynrap (additional) sa T. 50 klur na ka Kyiad.
Ia kane ka rai la shim ha ka jingialang jong ka Kynhun Myntri kaba la pyniaid da u Myntri Rangbah ka Jylla Conrad K sangma.
Haba iakren bad ki nongthoh khubor, u Myntri Sorkar Marcuise N Marak ula ong “Ki don bun jait ki brand jong ka kyiad hapoh ka Jylla jong ngi bad ngi hap ban pyniabynta biang ia ki ban ioh lum khajna kham bun. Mynta, ngin don noh tang 5 jait ha ka jaka hynriew jait”.
Ula ong ba ka khajna excise duty la khmih lynti ba kan kiew da 15% bad ba ka Jylla kan ioh shuh shuh ia ka khajna sa T.50 klur ha ka shisnem. Ia mynta,ka jingioh lum khajna na ka kyiad ka long T. 350 klur shisnem.
U Commissioner & Secretary ka Tnad Excise Sanjay Goyal ula ong ba ka jingioh lum khajna jong ka Tnad ha kine ki san snem bala leit noh, kala kot ia ka T.1200 klur.
