Shillong, Risaw 31 : Ka National People’s Party (NPP) kala thung ia u Bah Prestone Tynsong, kum u President ba thymmai ka NPP-Meghalaya hadien ka jingiehnoh kam u President barim Dr. WR Kharlukhi.
Kat kum ka jingpynbna (Notification), u National President ka party bad Myntri Rangbah ka Jylla Conrad K Sangma ula thung ia u Bah Prestone Tynsong kum u President ba thymmai ka NPP-Meghalaya kat kum ka kyndon ba 7 (ii) jong ka National People’s Party (NPP).
U Conrad ula pyntip ruh ba da kane ka jingthung kum u State President, la pyllait noh ia u Bah Prestone na ka jingbat kam ha ka National Committee.
Lah ban kdew ba u Bah Prestone u ba bat kum u Symbud Myntri Rangbah ka Jylla (DyCM), u dei ruh uba bat kum u National Vice President ka NPP.
Na ka liang u Bah Prestone ruh ula pdiang ia kane ka jingthungkam bad ula shimti syndon ia ka kam.
Ka NPP-Meghalaya kala pynithuh iala u State President ba thymmai ha ka jingialang ba long hynne ka sngi Ba-ar, hapoh ka Ophis ka Party ha Shillong, Ha kane ka jingpynbna, la iadonlang ruh u Myntri Rangbah ka Jylla Conrad K Sangma.
U MP ka Rajya Sabha Dr WR Kharlukhi ula iehnoh ia ka kam State President ka NPP namar ka rta, ong ka khubor ba iohlum.
Haba thoh hapoh ka X, u Myntri Rangbah ka Jylla ula pyntip ba u Bah Prestone ula shimti ia ka shuki President, ka Meghalaya State Unit ong ka NPP na u Dr Kharlukhi.
Shri Prestone Tynsong takes over as President, Meghalaya State Unit of the National People’s Party today from Dr. W R Kharlukhi.
Dr. W R Kharlukhi has served as President for 16 years and his time with the NPP was even longer as a confidant and friend of our leader, (L) Purno A… pic.twitter.com/nd94m5danA
— Conrad K Sangma (@SangmaConrad) October 31, 2023
U Conrad ula kren ruh halor ki jingshakri jong u Dr Kharlukhi kum u President ka NPP.
“U Dr Kharlukhi ula shakri kum u President la 16 snem bad ka por jong u bad ka NPP kala kham slem kum u briew ba shaniah bad u paralok jong u Nongialam jong ngi (L) Purno A Sangma. Ngi ai khublei ia u halor kine ki slem ba ula aiti ha ka kam bad ka jingnoh synniang ka bym lah thew shuh sha ka NPP” ula ong.
U Conrad ula kitbok ruh ia u Bah Prestone haba pynpaw ia ka jingshaniah skhem ha ka jinglong nongialam jong u.
“U Bah Prestone da ka jingshemphang bala bun snem ha ka kam sain pyrthei ka Jylla, un shim ia ka jingkitkhlieh na u Dr Kharlukhi bad nang pynsuhthied ia ka NPP ha Meghalaya bad ha ka thain Shatei Lam Mihngi. Ngi don ia ka jingshaniah kaba skhem ha ka jinglong nongialam jong u bad ngi kitbok ruh ia kaba bha tam” ula bynrap.
