Ban khlain noh ka rukom treikam ki shnat ka Corporation
Shillong, Jylliew 27: Ka Sorkar Jylla kala rai ban phiah noh la ka jong ia ka kam Chairman-cum-Managing Director (CMD) ka Meghalaya Energy Corporation Limited (MeECL) ban pynthikna ia ka jingjanai ha ka rukom treikam bad jinglah treikam jong ka Corporation.
Ia kane ka rai ban pynkylla ia ka rukom treikam hapoh MeECL bad ki lai tylli ki shnat jong ka-ka Meghalaya Power Generation Corporation Ltd (MePGCL), ka Meghalaya Power Distribution Corporation Ltd (MePDCL) bad ka Meghalaya Power Transmisson Corporation Ltd (MePTCL) la shim da ka jingialang jong ka kynhun Myntri ba long hynne ka sngi nyngkong.
Cabinet has decided to restructure the board structure of the MeECL & its 3 subsidiaries. The post of Chairman & MD will be segregated with a full time MD of the MeECL from the IAS cadre/Lateral Entry/ Technocrat who will be selected by a transparent process@RajKSinghIndia pic.twitter.com/qzSHfYEg1Q
— Conrad Sangma (@SangmaConrad) June 27, 2022
Haba iakren bad ki lad pathai khubor, u Myntri Rangbah ka Jylla ula ong “Ngi la rai ba ngin phiah noh la ka jong ia ka kam CMD jong ka MeECL. Ka Sorkar kala rai ba un thung noh da u Managing Director (MD) ba pura jong ka MeECL. U MD u lah ban dei mano mano na ki ophisar IAS ne ka jingthep ia ki Technocrat ia kaban jied haba shit haba shai. U briew u ban dei u MD jong ka MeCL un dei ruh u MD jong ka MePGCL, MePDCL bad MePTCL”.
“U Chairman jong ka MeECL un dei u Myntri kam bording katba ki Chairman jong ki lai tylli ki shnat (MePGCL, MePDCL bad MePTCL) kan dei ka Chief Secretary lane ki Additional Chief Secretary lane ki Principal Secretary ba khmih ia ka Tnad bording” ula ong.
U Conrad ula pyntip ba ia kane ka rai la shim halor ka jingiohi ba ha kine ki 50 snem bala leit noh, ka MeECL ka dei kaba la pyniaid da ki Ophisar naka Sorkar Jylla kiba don bun ki kam ba hap ban leh bad namar kata, ka long kaba shitom ia ki ban ai kham bun ka por ha kaban pyniaid ia ka Corporation ha ka lynti kaba dei.
“Namar kata, ngi la shim ia kane ka rai na ka bynta ka jingbha bad ka jingpynjanai ia ka rukom treikam jong ka MeECL bad ki shnat treikam jong ka” ula bynrap.
Haba kylli, u Myntri Rangbah ula ong ba kawei pat ka lynti kaba ka sorkar ka don ka long ban thung da ki Technocrat ki ban shimti ban pyniaid ia ka MeECL kum ki MD.
“Kane ka dei ka kam kaba ngi la iakren teng bad kumta ngi la rai ba ngi donkam da u Technocrat ban pyniaid ia ka MeECL” ula ong haba bynrap “Namar kata, u briew uba la don ka jingshemphang ha ka tnad bording bad ba pyniaid ia ki PSU ha ki snem bala leit noh, un dei uba ngi kwah bad ngi sngew ruh ba kane kan dei ka jingleh ia ka kam kaba dei na ka bynta ka jingtreikam ba janai jong ka MeECL”.
Nalor kane, u Myntri Rangbah ula pyntip ba ka Sorkar ka khmih lynti ba da kane ka jingpynkylla ia ka rukom treikam, ka san iarap shibun ban pynjanai bad pynkhlain ia ka jingtreikam ka MeECL hynrei kane ka ym lah pat ban shu jia noh mardor.
