Shillong, Nailur 20 : Ka Sorkar Jylla kala rai ban kyrpad ia ka Sorkar Pdeng ba kan wanrah ia ka All India Institute of Medical Science (AIIMS) ha Jylla Meghalaya.
Haba jubab hapoh ka Iingdorbar Thaw ain ha ka sngi Balang, ka Myntri ka Koit ka Khiah Kong Ampareen Lyngdoh kala ong “Namar ka kyrteng AIIMs ka mut shibun kiei kiei ki nongpang naka thain….(ngi la iakren ia kane ka kam) bad u Myntri Rangbah ka Jylla bad hooid ngin sa rah iakren bad ka Sorkar Pdeng. U (CM) la pynkhreh ia ka DO letter sha u Myntri ka Koit ka Khiah ka Sorkar India ban pyni ba ngi ruh ngin long kiba donbok ban ioh ia kum kane ka Institute hapoh ka Jylla Meghalaya”.
U Nongialam ka Liang Pyrshah Bah Ronnie V Lyngdoh ula ong ba ka AIIM kat dei tang ka kyrteng hynrei ka don ia ka bor treikam bad ka jingdon ia kum kane ka Institute hapoh ka Jylla kan iarap shibun eh ban pynsting ia ka jinglut jingsep ki paidbah na ka thain.
Kat kum ka jingong jong u, la kyrpad ia ka Sorkar ban iakren ia kane ka kam naba ka Ministry ka kwah ban kyntiew kyrdan ia ka Regional Institute of Medical Sciences (RIMS) sha ka Institute kum ka AIIMS. Ula ong baka Sorkar ka lah ban iasaid ia kane namar ka Jylla kala don lypa ia ka North Eastern Indira Gandhi Regional Institute of Health and Medical Sciences (NEIGRIHMS).
Halor ka jingthmu ban wanrah ia ka Meghalayan Medical Drugs and Service Limited (MMDSL), ka kong Ampareen kala ong ba ka MMDSL ka dei kaban pynkhlain ia ka rukom thied dawai bad ban pynbeit ryntih ia ka jingsupply dawai, ban pynthikna ia ka jingiaid beit ki jingsupply dawai, ban sumar ia ki tiar sumar ha ki jaka ai jingsumar ha Jylla, ban pyllait tender, billing bad kiwei kiwei khnang ban iaid beit iaid ryntih ka jingsam dawai ha Jylla.
Ha kajuh ka por haba shimkhia ia ka jingsngewkhia bala pynpaw da ki dkhot halor ka jingkynrei u droks, ka Myntri kala pyntip ba ka Sorkar kan sa wanrah ia ki de-addiction centre ia ki kynthei hapoh ka Drug Reduction Elimination and Action Mission (DREAM) project.
Kat kum ka jingong jong ka, kam pat don satia kano kano ka de-addiction centre na ka bynta ki Kynthei hapoh ka Jylla.
Shuwa kane, u MLA na Mawlai Bah Brightwellstar Marbaniang ula kyrpad ia ka Sorkar ban buh ia ka de-addiction centre ha ka constituency jong u, kaba la kylla long kawei na ki drug hotspot ne ka jaka ba jyllei eh u drok ha ka Jylla.
