Shillong, Nohprah 07 : Ka Sorkar Jylla kala rai ban ai tam sa 1.4 acre ka jaka ha kaban pynkynriah ia ki 342 tylli ki Longiing ka Them Metor na Them Iew Mawlong haba pynpaw ia ka jingsngewskhem ban lah pynbeit noh ia kane ka kam hapoh ka taiew ba-ar jong u Kyllalyngkot, 2024.
Ia kane ka rai la pynbna hadien ka jingialang bala pyniaid da u Symbud Myntri Rangbah ka Jylla ba khmih ia ka kam Pohiing Bah Prestone Tynsong bad Symbud Myntri Rangbah ka Tnad Pynroi Sor Bah Sniawbhalang Dhar bad ka kynhun Nongialam ka Harijan Panchayat Committee, ia kiba la wan synran da ki Nongmihkhmat ka Delhi Gurudwara hynne ka sngi Palei ha Main Secretariat.
Haba iakren bad ki nongthoh khubor, u Bah Prestone ula ong ba kane ka jingialang ka long kaba iaid beit iaid ryntih.
“Hynrei shuwa ban pynkut, ngi la ailad biang ia ki sa shisien ba kin iashong iakren para ma ki. Hadien ba kila dep, ngi la dep buh ia ka por ba ha lane shuwa ka taiew ba-ar u Kyllalyngkot, ngin sa iashong biang bad shim rai ia baroh kiei kiei” ula ong.
“Namar ba ki (HPC) dang pynpaw ia ka jingsngewkhia sa ia katto katne ki kam kiban sa iakren hapdeng jong ki, ngi la shah ia ki bad kyntu ba kin leh ia kata bad ha lane shuwa ka taiew ba-ar ngin iakynduh biang” ula ong.
Haba kylli, u Bah Prestone ula ong “Ka blue print bala pynkylla thymmai ka long kumne, ba ha ka Ophis ba don mynta jong ka Municipal Board, ngi don kumba 2.14 acre ka jaka bad namar ba kam pat dap ban ai jaka ia baroh 342 Longiing, ngi sa mynjur ban ai biang ia ka jaka kaba long sa 1.4 acrea”.
Katba u Nongialam ka HPC u Gurjeet Singh ula ong ba ka jingiakren bad ka sorkar ka long kaba biang khamtam haba ka sorkar kala pdiang ia ki katto katne ki jingai jingmut hynrei ia mynta hi kin leit ban pynsngew shwa sha kiba shong basah ha Them Metor bad kin sa wan ban iashimbynta biang ha ka jingialang kaban long ha u bnai Kyllalyngkot jong u snem ban wan.
U General Secretary ka Delhi Sikh Guridwara u Jagdeep ula ong, ba ka jingiakren bad ka sorkar ka long kaba sngewtynnad ha kaba kala don ka jingiasngewthuh jingnut tangba um shim la treh ban batai eiei ia ka jingkyrpad jong ka HPC hakhmat jong ka sorkar.
U Gurjeet ula ong ba u kyrmen skhem ba ha ka jingialang kaban wan yn lah ban shim noh ia ka rai kaba khatduh bad ban pynkut syndon noh ia kane ka kynrum kynram.
