Nongpoh, Nohprah 07 : Ka Western Ri-Bhoi Dorbar, ka synjuk ki Dorbar Shnong ka thain Western Ri-Bhoi, kala rai ban iatreilang noh bad ka Synjuk ki Rangbah Shnong ka Ri-Bhoi District ha baroh ki kam ba iadei bad ka dong Ri-Bhoi.
Kane ka rai kala mih na ka jingialang hapdeng ka Synjuk ki Rangbah Shnong ka Ri-Bhoi District bad ka Western Ri-Bhoi Dorbar, kaba long hynne ka sngi Palei ha ka Hall jongka Dorbar Shnong Patharkhmah.
Kane ka jingialang kala iatai sani bha halor ka jingdonkam ban ialong kawei kum ki Dorbar Shnong ka dong Ri-Bhoi bad ban ia ieng ryntih ha kino kino ki kam kiba iadei bad ka khia ka shon u paidbah ka dong Ri-Bhoi khamtam eh ki kam ba iadei bad ki Dorbar Shnong.
Na ka liang ka Synjuk ki Rangbah Shnong ka Ri-Bhoi District la mihkhmat da u Chairman Bah Banbuhai Makdoh, Secretary ka Nongpoh Town Committee Bah Rayonald Kharkamni lem bad ki Rangbah Shnong kiba dei ki dkhot ka SRSRB.
Ia ka Western Ri-Bhoi Dorbar la lamkhmat da u President Bah Enias Rani, Vice President Bah Petelman Thangkhiew, Treasurer Bah Repolas Nongti bad ki Sordar jong ka thain Western Ri-Bhoi.
