Shillong, Jymmang 05 : Ka People Democratic Front (PDF) kala rai hynne ka sngi Thohdieng ha ka jingialang jong ka General Council ban leit bynrap noh sha ka National People’s Party (NPP) lashai ka sngi saitjain.
Ia ki Nongialam bad ki MLA ka PDF yn pdiang da u National President ka NPP bad Myntri Rangbah ka Jylla Conrad K Sangma ha ka jingialang ka ban pynlong ha Ophis treikam ka NPP, ha ka por 4 baje janmiet.
Ha kane ka sngi kan don ruh ka jingiasoi ia ka soskular bynrap (merger) hapdeng u President ka PDF bad MLA ka Sohra Bah Gavin M Mylliem bad u National President ka NPP Conrad K Sangma.
U Bah Gavin ula pynshai ba kan nym don satia ka jingpynduh pyndam noh ia ka PDF hynrei kan don da ka jingiateh soskular ban bynrap (merge) sha ka NPP.
Haba iadei bad ka shuki Myntri Sorkar, u Bah Gavin ula ong ba ka PDF kan ieh ha ka jingstad jong u Nongialam ka NPP bad Myntri Rangbah ka Jylla.
Pule lang ia kane: Phah ka Sorkar ia ka Kynhun sha Imphal ban iarap ia ki Nong Meghalaya ba kwah wan phai shala Iing
Haba kylli ia ki daw ka jingleit bynrap, u Bah Gavin ula ong ba hadien ka jingiatreilang bad ka Sorkar MDA-I ba ialam da ka NPP, ka PDF ka sngew iahap bad ki rukom treikam jong ka NPP. “Kiba bun na ki mat treikam ka NPP ki iahap bad jong ka PDF” ula ong.
Lah ban kdew hangne ba ka PDF ka dei kaba la pynkha ha u snem 2017 bad kala jop 4 seat ha ka elekshon MLA 2018. Hynrei arngut na ki MLA jong ka, kila iehnohkam bad leit iasoh sha ka NPP.
Ha ka elekshon MLA 2023, ka PDF kala lah ban jop tang 2 ngut-u Bah Gavin M Mylliem na Sohra bad u MLA ka Mawkynrew Bah Banteidor Lyngdoh.
Ka khubor bala ioh lum ka iathuh ba ki kyndon ha kane ka soskular kan dei eh ki jingkular bala khlei da ka PDF ha ka elekshon manifesto 2023.
Da kane ka jingiasoh ka PDF, ka NPP mynta kala don haduh 28 ngut ki MLA ha ka Iingdorbar ba 59 ngut ki MLA. Ka NPP ka donkam sa 3 ngut ki MLA ban ioh ia ka absolute majority (palat ia ka shiteng).
Pule lang ia kane: Assam: Siat ki Pulit na kjat ia u briew ba lehbeijot bad pyniap ia ka Khynnah 12 snem
