Shillong, Jymmang 03: Ki nongniah trok hapoh ka shatri Meghalaya Comercial Truck Owner And Driver Association (MCTODA) hynne ka sngi kila rai ban sangeh kit Coke naki thain Nongjri South West Khasi Hills.
Kane kadei namar ka jingshah shoh u Bah Philandar S Thongni u nongialam ka MCTODA South West Khasi Hills.
Ia kane ka rai ban iakhih khlem pud sngi daka ba sangeh kit Coke naki thain Nongjri South West Khasi Hills la shim haka jingialang jong ka MCTODA ha Nongniah Shillong.
Haba kren shaki lad pathai khubor u President ka MCTODA u Bah Moss Klandar Mangar u la kynnoh ba ka jingshah shoh u nongialam ka Association na South West Khasi Hills kadei ka jingiasuh beit hapdeng ki trai Coke Factory bad katto katne ngut kiba donkti ban shoh ia u dkhot ka Association.
U Bah Moss u la kynnoh ba kane ka jingshah ia ia u Bah Philandar S Thongni kadei tang ban pyntieng pynsmiej namar kum kane ka jingshah rah kti ki nongialam ne ki Dribar Trok kam dei shuh ka sien kaba nyngkong.
“Ngim kwah shuh ban pynpaw iaki kynhun ba thombor ia u nongialam jong ngi na South West Khasi Hills. Ngi kwah ban kito kiba donkti ban shoh ia u nongialam ka Association kidei ban wan iakren bad ngi bad lada kim lah ngin pynlong ka jingiakhih ba khlem pud sngi kata ban sangeh ban kit Coke naduh mynta ka sngi na ki Coke Factory kiba don hapoh ka thain Nongjri” la ong u Bah Moss.
Haba iathuh halor ka jingshah shoh, u Bah Philandar S Thongni u la iathuh ba kane kala jia haka 30 tarik Iaiong katba u dang ap pali ban kit Coke lem bad kiwei ki para nongniah trok.
“Katba ngi dang shong ha ki jaka ba ju pyniaid ia ki kali kit Coke ha Nongrji bad ha ka por 12 baje mynsngi la wan kawei ka Trok bad haba ngi Check ia ka number, ngi la lap ba kam dei ka number ba ju don ha ki thup ban kit Coke” la ong u Bah Philander.
U Bah Philander u la iathuh ba haka por ba ap pali, u la leit kren ia u nongniah trok ba khlem don haka thup hynrei une u nongniah trok ula phone briew. “Kynsan kynsan hapoh shi teng kynta la wan ki katto katne ngut ki briew na kane ka thain bad kila thombor beit ia nga, da kaba ki la kylli, balei u bat ia ka kali jong ki” u la ong.
