Shillong, Jylliew 21: Ka Khasi Hills Autonomous District Council (KHADC) hynne ka sngi ba-ar kala rai ban pynlong kongsan ia baroh ki MDC ba kin aiti ia ki Utilization Certificate (UC) hashuwa ban pyllait ia ka Discretionary Grant (DG).
“Ngi la rai ba baroh ki MDC ki dei ban aiti shuwa ia ki UC ha kaban pyntreikam ia ka DG” ong u Chief Executive Member (CEM) ka KHADC Bah Titosstarwell Chyne haba iakren bad ki nongthoh khubor hadien ka jingpyniaid ia ka jingialang jong ka Executive Committee.
Mynshuwa, ka KHADC ka ju pyllait shwa ia ki DG sha ki MDC ba kin ai jingiarap hala ki jong ki Constituency bad sa aiti hadien ia ki UC, ula ong bad bynrap “Namar kane, ka AG na ka por sha ka pork ala lap ba bun ki MDC kim shym la lah ban aiti ia ki UC”.
Ha ka 10 tarik Jylliew, u Lat ka Jylla Satya Pal Malik ula bthah ia ka Sorkar Jylla ban thung ia ka jingtohkit halor ka jingbym lah jong ki Autonomous District Counci (ADC) ban aiti ia ki jingkheiñ jingdiah la bun bun snem.
Kane ka jingbthah kala mih hadien ba u Lat ula ioh pdiang ia ka shithi na ka CAG ba kdew ia ka jingbym ai jingkhein jingdiah jong ki District Council la bun snem bad ruh ka jingbym wanrah ia ka kaiphod jong ka CAG hapoh ka Iingdorbar Thaw Ain.
Haba kylli, u CEM ula ong ba ka jingpynsngew jong ka AG ka dei kaba iadei bad ka kaiphid jong u snem 2011-2012 bad 2012-2013.
“Ka kaiphod CAG kadei tang haduh u snem 2013 bad naduh une u snem haduh mynta, kam pat shym la pynmih satia ia kano kano ka kaiphod watla kila dep ban eh audit ia ki jingpynlut pynsep jong ngi” ong u CEM.
Hynrei ula ban jur ia ka jingdonkam ban don ka Internal Audit shisien ha manla ka lai bnai. U pyntip ruh ba ka EC kala pynkhamti ha uwei u Executive Member ban khlieh ia ka Committee na ka bynta ban peit ia ki nongkynti jong ka Council.
