SHILLONG, Risaw 19: U MLA ka Pynthorumkhrah U bah A.L Hek hynne ka sngi Balang, u la pynthikna ba ka Bharatiya Janata Party (BJP) Meghalaya kan pynieng beit ia u Bernard N Marak ban iakhun pyrshah ia u Myntri Rangbah ka Jylla Conrad Kongkal Sangma haka ilekshon MLA-2023.
Haba kren sha ki lad pathai khubor u bah Hek ula kam ba ki jingshah kynnoh ba bun jait pyrshah ia u Bernard ne ia ki nongmihkhmat hapoh ka jylla ne hapoh ka ri India kin mih beit man ka por hynrei tad haduh ban da rai daka ïingkashari, ym lah ban ong ba ula donkti shisha haki kam beain.
U Bernard ula shah kem ha ki Pulit halor ka jingkynnoh ba u pyniaid ia ka ktem khaii met hapoh ka Farm House jong u kaba don ha Tura. Kane ka jingkynnoh kala mih hadien ka jingkhynra jong ki Pulit ia kane ka Faram House kaba lam sha ka jingioh pyllait ia 5 ngut ki Khynnah bad ka jingkem ia bun phew ngut ki briew, nalor ka jingkurup ia ki tiar pynmynsaw bad kiwei kiwei.
U bah Hek ula iathuh ba watla u state vice president ka BJP u Bernard N Marak u dang don ha patok hynrei ka party kan pynieng beit ia u na ka Constituency kaba mihkhmat da u Myntri Rangbah ka jylla u Conrad K Sangma ha ka elekshon ban wan.
“Ka BJP ha Garo Hills ka khlain bha khamtam ha ka North Tura bad South Tura bad u Bernard Marak u la dei lypa u dkhot ka Garo Hills Autonomous District Council (GHADC) na South Tura bad dei namar kane ka BJP kan pynieng beit da u Bernard tad haduh ka rai ba khatduh daka ïng bishar haba iadei bad ki jingshah kynnoh” la ong u bah Hek.
U bah Hek ula ong ruh ym tang ha Meghalaya hynrei ha kiwei ki jylla ka ri India ruh ki don ki briew kiba iakhun ilekshon napoh thanat bad lada u Bernard u dang don sah ha thanat haduh 2023, un hap hi ban iakhun iaka ilekshon na thanat.
Ula kam ba ka BJP ka kwah ban jop haduh 15 tylli ki seat ha Garo Hills lada ka ioh iaki kyrtong kiba biang hynrei watla kata ruh ka party ka thikna ban jop beit haki palat 10 tylli ki konstitwensi.
Nalor kane u bah Hek ula iathuh ba haka por ba u don hapoh Garo Hills u la leit ruh ban kynduh ïa ka ïing jong u Bernrad bad ula kular haka ïng ka sem jong u baka BJP ka don ryngkat bad u Bernard bad ka kloi ban iarap ha kino kino ki bynta ba u Benard lane ka ïng ka sem ka donkam.
