Shillong, Risaw 19: U Myntri ka Tnad Public Works Department Bah Renikton Lyngdoh Tongkhar ula pyntip ba ka sorkar Jylla kala buh ia ka jingtyrwa ban pyntreikam ia ka skhim Jaal Jeevan Mission (JJM) ba kot T. 32 klur ha ka shnong Mawpat ban pynbiang umbam umdih ia ki thliew iing jong kane ka shnong khap sor ka Nongbah Shillong.
U Myntri ula pyntip ia kane ha ka jingiakynduh bad ka kynhun ki Nongialam Shnong ka Mawpat kaba la synran da u MLA ka thain Bah AL Hek hynne ka sngi Balang.
Haba kren sha ki lad pathai khubor hadien ka jingialang, u bah Hek ula iathuh ba ka shnong Mawpat kadei ka shnong kaba dang duna bha ha ka rukom sam um bam sha ki longïng bad kane ka buh jingeh bha iaki paidbah jong kane ka shnong.
U bah Hek ula iathuh ba ka jingiakynduh ia u Myntri ka tnat PHE ka long kaba seisoh namar la ioh jingtip baka sorkar kala kynthup lang iaka shnong Mawpat hapoh ka skhim sam um kata ka Jaal Jeevan Mission (JJM).
“Ka long ka khubor kaba bha tam namar ka sorkar jylla kala mang T.32 klur ban pyntrei iaka skhim JJM ban pynthikna ba ki paidbah ka shnong Mawpat kin ioh um bam um dih ha ki sngi ban wan” la ong u bah Hek.
U bah Hek ula iathuh naka liang u Myntri ka tnat PHE ula kular ba shen ka jingbuh maw nongrim ban pyntrei iaka skhim JJM kan sa urlong noh hapoh ka shnong Mawpat kum shi bynta ban pynthikna ba ki longing kin ioh noh ia ka um bam um dih nangne shakhmat.
Ula iathuh ruh ba ka State Level Sanctioning Scheme Committee (SLSSC) kala dep ban ai ka jingmynjur ban pyllait noh iaka song pisa naka bynta ban pyntrei iakane ka skhim.
Nalor kane u MLA ka Pynthorumkhrah u bah A.L Hek ula iathuh ba ka jingiakynduh ruh kadei ban plie noh iaka Incubation Centre namar ia kane ka jingtei la dep ban pyntrei la slem mynta.
Haba iadei bad kane u bah Hek ula iathuh ba ia kane ka Incubation Centre la mang T.18 klur bad la sdang ban tei haka por ba u bat kum u Chairman ka MIDC bad ka jingplie noh ia kane ka Centre kan ai jingmyntoi iaki paidbah khamtam iaki samla.
