Shillong, Lber 07: Ka Bharatiya Janata Party (BJP) Meghalaya hynne ka sngi kala shim rai ban pynbate mar arsnem shiteng ia ka por ban shimti ia ka shuki Myntri Sorkar hapdeng ki 2 ngut ki MLA ka party kata u bah Alexander Laloo Hek bad u bah Sanbor Shullai.
Ia kane ka rai la shim hadien ba u bah A.L Hek ula shah pynbam smai kum uwei na ki Myntri Sorkar hapoh ka sorkar synrop lang Meghalaya Democratic Alliance (MDA 2.0) ba ialam da u Conrad K Sangma kum u Myntri Rangbah ka jylla Meghalaya.
Haka shithi sha u National President ka National People’s Party (NPP) u President ka BJP Meghalaya bah Ernest Mawrie ula ong “Ka party bad 2 ngut ki MLA kala mynjur ban ailad ia u bah A.L Hek ban shimti iaka shuki Myntri Sorkar naka bynta 2 snem shiteng ka ban kut haka 7 tarik Nailar 2025 bad hadien kane yn sa shimti sa u bah Sanbor Shullai bad naka liang ka Party kala kyntu iaki MLA ban burom iaka rai jong ka Party naka bynta ka bha ka miat jong ka party bad ka sorkar”.
“Halor kane nga kyntu iaka ophis treikam jong phi ban burom iaka rai jong ka Party khnang ba baroh 2 ngut ki MLA kin ioh ia ka lad ban shakri haka sorkar haba pynshong nongrim katkum ka jingheh kyrdan bad jingkyrshan ia ka sorkar jong phi” ula ong.
Ha kane ka shithi sha u National President ka NPP, la soi ruh da u BJP Meghalaya In-charge u Dr. M Chuba Ao, u bah A.L Hek bad u bah Sanbor Shullai.
Haba kren sha ki lad pathai khubor u bah Sanbor ula ong ba iaka rai ban iaphiah mar 2 snem shiteng iaka jingbat Myntri Sorkar la shim ha ka jingialang jong ka BJP Meghalaya ha ka jingdonlang ki nongtrei ka party ym dei kumba la shim ha u snem 2018 kaba la shim rai tang da ka ktien.
“Nalor u Myntri Rangbah, ka BJP Meghalaya kala phah ruh ia kane kajuh ka shithi sha u BJP National President u J.P Nadda bad sha General Secretary u Rituraj Sinha” la ong u bah Sanbor.
U bah Sanbor ula ong ba um don jingwit eiei halor ka jingshimti Myntri Sorkar hadien 2 snem shiteng bad un iai ap iala ka pali ban long Myntri Sorkar.
“Ka shong haka rai jong u Myntri Rangbah ka jylla bad kum u nongmihkhmat paidbah nga pdiang ia kaei kaba la pynkhamti ha nga naka bynta ka bha ka miat u paidbah ka constituency” la ong u bah Sanbor.
