Shillong, K’lyngkot 11 : Ka Nongaiktien ka All India Congress Committee (AICC),Wing Commander (retd) Anuma Acharya, kala pyntip ba ka Congress kala rai ban boycott ia ka jingialang plie paidbah ia ka Ram Mandir haba pynpaw ba ka niam ka dei ka kam ba long shimet hynrei ka BJP kala pynkylla long tamasa Politics.
Kane ka Nongaiktien ka Congress kala ong ba kane ka rai ban boycott ka dei kum ka jubab ia ka jingthmu leh politics jong ka BJP. “Ngi la kiar ia kane ka jingialang politics namar kam dei ka jingialang hok. Kane ka dei ka kam ba long shimet bad ka jing boycott ka dei ka lynti jong ngi ban pynpaw ia ka jingpyrshah halor ka jingpynlong kam politics ia ka jingshna temple” ong ka Acharya.
Haba iakren bad ki lad pathai khubor hynne ka sngi Palei ha Congress Bhavan, Shillong, ka Acharya kala kren halor ki 24 snem ba ka don hapoh ka jingshakri ha ka Indian Air Force bad kumno kala iohi ia baroh ki saw tylli ki jaka mane blei.
“Ka Mandir, ka Gurudwara, ka Masjid bad ki Iingmane-baroh ha kawei ka jaka ha ka por ba nga dang don ha ka kam shipai. Ka niam hi ka dei ka kam ba long shimet bad ngi ngeit ha ka kam shipai ba ka dei ban neh kumta hi” ong ka Acharya.
Haba pynpaw ia ka jingsngewkhia halor ka jingtrei kaba dang iaid jong ka Ram Temple, ka Acharya kaba pynithuh ialade kum ka Hindu Brahmin, kala ban jur halor ka jingbym pat pyndep hok ia ka temple.
“Ka niam jong nga ka ong ba ka temple kaba la dep pura ka kynthup ia ka Pranpratishthma. Ka temple kan ym long kaba la dep namar ka ‘Kalash’ ka bynta jong ka khlieh ka dei ka bym pynshong” kala ong.
Ka Acharya ka pyntip ba ki saw Shankaracharyas ruh kila boycott ia kane ka jingialang haba ban jur ba ka jingpyndep ia ka temple kat kum ka tynrai ki Hindu, ka long kaba kongsan bha.
Ka Acharya kala kynnoh ia ka BJP ba ka shim kabu ha ka jingtei ia kane ka temple ban myntoi ha ka kam politics. Kala kynthoh “Kane ka dei ka jingialang politics lem kumta, kila dei ban ap hapoh ka Ram Navmi, ka sngi ba kha ia u Ram, bad la dei ban leh ha kane ka sngi. Hynrei kila kwah ban leh noh shuwa ka elekshon”.
