Shillong, Jylliew 03 : Ka Executive Committee ba ialam da ka Voice of the People Party (VPP) ha Khasi Hills Autonomous District Council (KHADC) kala weng kam noh ia 13 ngut ki Nongtrei ba thymmai bad pyndam noh ia ka hukum thungkam pura ia ki 30 ngut ki nongtrei casual hadien ba la thung ia ki khlem ka jingmang ia ka kam (sanction).
Haba pyntip ia kane ha ka sngi Ba-ar, u Chief Executive Member (CEM) ka KHADC Bah Shemborlang Rynjah ula ong ba ia kane ka rai la shim halor ka kaiphod bala aiti da ka Committee bala thung da ka Executive Committee ban pynbeit ryntih ia ka jingtreikam jong ka Council.
Ula pyntip ba ka Committee, kaba la shong jingialang haduh san sien, kala shong bishar ia ka jingshakri ki nongtrei ka District Council bad ha kane ka jingbishar kam, la mih ka jingthungkam ia ki 43 ngut ki nongtrei. Na kine, 13 ngut ki dei kiba dang shu thungkam thymmai bad 30 ngut ki dei kiba la thungkam pura hadien bala thung ia ki kum ki nongtrei Casual.
“Hadien bala bishar bha, ngi shem ba ka jingthungkam ia ki la leh khlem ka jingmang ia ka kam” ong u Bah Rynjah haba bynrap “Haba pynshong nongrim ia ka kaiphod bala aiti da ka Committee, ka EC kala rai ban pynsangeh noh ia ka jingshakri ki 13 ngut ki nongtrei ba dang shu thung thymmai bad halor ki 30 ngut ki nongtrei Casual, kiba la shah thungkam pura, ngi la rai ban pynkylla biang ia ka hukum thungkam pira ia ki bad la shah ia ki ba kin bteng ia ka jingshakri kum ki nongtrei Casual”.
Kat kum ka jingong jong u, ki 13 ngut kiba dang shut hung thymmai, ki dei kiba la wan trei ha u bnai Naitung bad Nohprah 2024 kum ki constable ka Tnad Enoforcement, Peon, Mali, Cleaner bad kiwei kiwei.
Haba pynpaw ba ka KHADC kam don ia ka pla tyngka kaba biang, u CEM ula ong ba ia mynta, ki don palat 70 ngut ki nongtrei contract bad ka jingsiew tulop ia ki la pynbeit na ka Administrative Charge ba 5% jong ki scheme bapher bapher.
Ka kynhun jong ki Nongtrei kiba shah ktah na kane ka jingpynkylla ia ka hukum, kila leit iakynduh ia u CEM ban kyrpad ia u ba un pyrkhat biang sa shisien ia kane ka rai.
Haba kylli, u CEM ula ieng skhem ba ka EC kan ym pynkylla shuh ia ka rai bala shim bad ong “Mynta, ka shong ha ki la ki dang kwah ban bteng ne sangeh noh kum ki nongtrei Casual”.
“Ngin dang bteng ruh ban leh eiei pyrshah ia kito ki nongtrei bala thungkam khlem ka jingmang ia ka kam” ula pynbna.
Nalor kane, u CEM ula ong b aka Committee for Administrative Streamlining hapoh ka Council, kan sa shong bishar ruh ia ka jingdonkam ban pynkylla ia ka service rules.
“Ngi la rai ruh ban thung ia ka Recruitment Committee (ban pynthikna ia ka jingshai ha ka thungkam thungkam hapoh ka Council” ula bynrap.
 ha Khasi Hills Autonomous District Council (KHADC) kala weng kam noh ia 13 ngut ki Nongtrei ba thymmai bad pyndam noh ia ka hukum thungkam pura ia ki 30 ngut ki nongtrei casual hadien ba la thung ia ki khlem ka jingmang ia ka kam (sanction).){kind=link}