Nongstoiñ, Risaw 8: Ka kynhun ialehkai Tyllang Junior ka la ioh rah ia ka nam kum ka Champion ne lahduh ha ka lympung ialehkai phutbol U-15 ka Mawsngapwir Sports Club.
Kane ka kynhun kala pynliem ia ka Mawthungkper Sport Club lyngba ka Penalty 1-3 hadien ka jingïakhaid ha Madan 1-1, ha ka jingiakhun phainal kaba long myn ha ka sngi Saitjain.
Ha katei ka sngi shuwa ban ïalehkai ïa ka Final, la pynlong ïa ka jingïalang lyngkot ba la pynïaid da u samla Jop Syiem Nongïalam ka Club, u ba la ai khublei ïa baroh ki kynhun kiba la wan iashimbynta kumba 22 tylli ei ei. U la ai khublei kyrpang ruh ïa ki ar tylli ki team kiba la poi ha ka Final.
Kumjuh ruh la ïoh jingkren na u kongsan ha katei ka sngi u Samla Lumlang Kharsyiemlieh President ka HYC West Khasi Hills District, u ba la lyntu ïa ki samla ba kim dei ban klet ïa la ka jinglong Khristan haba ki don ha madan, khnang ba kata kan kyntiew ïa ki bad ïa ka sap jong ki.
U la ban jur ruh sha baroh ban ong em ïa ki jingdih ba sniew bad ban ong hooid ïa ka jingïalehkai, ban nang kiew shaphrang ha ka jingim jong ki, nalor ba kim dei ruh ban klet ïa ki jingpule da kaba bate ïa ka por.
U kongsan, u la ai khublei kyrpang ruh ïa ka Mawsngapwir Sport Club kaba la ju pynlong ïa ki jingïalehkai man ka por, ban kyntiew ïa ki kam ïalehkai football ha ka thaiñ. U la kitbok ïa ïa ka club kumjuh ïa baroh ar tylli ki kynhun ba kin kiew shaphrang.
