Nongpoh, Nailur 20: Ka kynhun ïalehkai football kaba la bna nam ha ka them Ri Bhoi District, ka Ri Bhoi United Football Club ka la ïoh syndon ban rah ïa ka nam lahduh ha ka lympung ïalehkai football kaba la long ha ka jylla Assam.
Kane ka lympung ialehkai ka dei kaba la tip kum ka 22nd All India JWHWLAO Baliram Boro Gold Cup Football Championship 2022 kaba la pynlong da ka Harisinga AC/ABSU bad ka Harisinga Football Association kaba la long hapoh ka Harisinga Rabi Kachari Mini Stadium, Udalgari Assam.
Kane ka nam lahduh ba la ïoh khur da ka kynhun ïalehkai football jong ka Ri Bhoi United FC ka la wan hadien ba ka la lah ban pynliem noh ïa ka kynhun jong Harisinga FC da 2-0 bad ïa kitei ki kol kiba la long ki namtam ban pynjop ïa ka Ri Bhoi United la thep da u Robert Khongjoh bad u Fashioning Syngkli.
Ha ka jingïakhun ïa ka phainal ban rah ïa ka nam kum ka lahduh jong katei ka lympung ïalehkai football, ka jingïakhun hapdeng ka Ri Bhoi United FC pyrshah ïa ka Harisinga Fc kaba dei ruh ka kynhun trai shnong ka la long shisha kaba ïa khaid bormet bha bad ka jingkhlaiñ jong ki rangïalehkai ban pyni ïa la ki sap ïalehkai football khamtam ka jingtreishitom ban pynïoh ïa ka namjop ïa la ki kynhun.
Watla ha ka jingïakhun kaba la kham satar bha hapdeng kitei ki ar kynhun ban rah ïa ka nam lahduh, hynrei ka jingtreishitom bad ka jingïasngewthuh jingmut para rangïalehkai ka Ri Bhoi United, ki la lah ban pynjem khnap ïa ki rangïalehkai ka Harisinga Fc da kaba ïoh ban khyrwit ïa ki ar kol jong ka jingjop ha ka kylla kaba nyngkong bad kaba ar bad ban rah syndon ïa ka nam lahduh jong katei ka lympung ïalehkai football kaba la long ha ka jylla Assam.
