Shillong, Nohprah 11 : Ka Ong Lahui Football Club, kala ioh rah ia ka nam Champion ne lahduh jong ka lympung ialehkai phutbol ka FKJGP-South Eastern Zone.
Ka Ong Lahui FC kala ioh ia kane ka nam da ka jinglah ban pynliem ia ka Shangdiar FC da 3-1 kol ha ka jingiakhun phainal kaba long myn ha ka sngi Saitjain bala lah.
Ia kane ka lympung la pynhap pyrda da u President barim ka FKJGP Bah Wellbirth Rani kum u kongsan ha ka jingiadonlang u General Secretary ka FKJGP Sengkmie Bah Eldie Newton Lyngdoh kum u Symbud Kongsan nalor ki nongialam ka Sengkmie bad ki riew rangbah ka thain.
Lah ban kdew hangne, ka FKJGP-SEZ kala pynlong ia kane ka lympung ialehkai kum shibynta ban pynmih pisa ha kaban pynshna Iing ia kawei na ki longiing ba duk jong ka thain.
Haba ai jingkren, u Bah Wellbirth ula kyntu ia ki samla ba kin pyrkhat thymmai noh halor ki kam ialehkai khamtam ka phutbol namar ka dei kawei na ki lad kamai jakpoh ha kine ki sngi ba mynta.
Ula ong ba kum ka Jylla ka sngew sarong ban iohi ia ki club ka Jylla ki ban mih aireng ha ka lympung ialehkai I-League jong ka Ri bad ka jingiohlad ki samla ban iashimbynta ha kine ki lympung kiba heh hapoh ka Ri.
Ula kyntu ia ki samla ba kin trei shitom ha kaban pyntbit ia ki sap ialehkai ba ki don khnang ba ka lad ka lynti kan plier uh ia ki ba kin kiew shaphrang ha ki kam ialehkai.
