Shillong, Iaiong 06: Ka 2nd YAI North East Regatta 2024 kaba la pynlong ha Umiam Sailing Club, Orchid Lake Resort, Watersports Complex, kala kut noh hynne ka sngi Saitjaiñ da ka jingpyninam ia ka rukom niah ia ki lieng.
Ia kane ka jingiakob la pynlong da ka Umiam Sailing Club (USC) bad ka UDAY for Sailors Foundation ryngkat ka jingiatreilang bad ka Yachting Association of India (YAI), ha kaba kila don 130 ngut ki nongniah lieng na kylleng ki bynta jong ka ri India.
Kila don 107 ngut ki nongiashimbynta kiba mihkhmat ia ki 17 club kiba la iashimbyntaha ki jingiakob ha ki kyrdan bapher bapher.
Ia kane ka lympung iakob la pynhap pyrda da u Director General of Police u Dr. L.R. Bishnoi kum u Kongsan ha kaba la iadonlang u Bah Cyril V. Diengdoh u CEO jongka Umiam Sailing Club, u Lt. Col. Alok Yadav, u Bah Robert Lyngdoh, Member Secretary ka USC.
Haba kren ha ka jingialang u Dr. LR Bishnoi, ula pynpaw ia ka jingkongsna ban ioh ia ka met kaba koit ba khiah krad namar kane kan iarap ha kaban kyntiew ia ka jinglong ha ka met bad ha ka bor pyrkhat bad dei ban don ia ka mynsiem pyrkhat kaba bha ha kino kino ki jingiakhun.
Katba u Bah Cyril V. Diengdoh, ula pynshlur ia ki samla ba kin iashimbynta ha ka jingniah ia ki lieng bad ula ai khublei ia ki nongpyniaid ia katei ka lympung iakob.
Ha kane ka jingiakob ka NSS Club kala ioh bun tam ki takma ksiar, katba ka
NBSC bad ka INWTC (M) kila wan baar ia kaba bud pat nadien da ka TSA bad EMESA.
