Kut ha jingiakhaid ka jingiakhun ka Langsning bad Rangdajied
Shillong, Nailur 09 : Ka Mawlai Sports Club ka la ioh ban rah ia ka nam lahduh jong ka Shillong Premier League khlem da donkam shuh ban mih iakhun hadien ba ka Langsning ka la iakhaid da mar 1-1 kol bad ka Rangdajied United FC ha ka kylla kaba ar jong ka League kaba long hynne ka sngi ha madan Third Ground Polo, Shillong.
Ka Mawlai kaba don mynta da 29 point, ka la ioh ban tam haduh 7 point ia ka Langsning bad Rangdajied kiba mynta ki don mar 22 point bad sa mar ar tylli ki jingiakhun ban mih madan.
Hadien ba ka la mih madan ha katei ka lympung iakhun kaba heh ha ka jylla hadien bun bun snem ha ka lympung First Division, ka jingioh ban rah ia ka nam lahduh ka la long ka jingjop kaba khraw bha ia ka Mawlai mynta ka samoi khamtam da ka jinglah jong kaban ialehkai bha naduh ba sdang jong ka lympung. da kaba jpo haduh 9 tylli na ki 11 tylli ki jingiakhun bad iakhaid pat ar tylli nalor ba ka shah thep ruh tang lai kol naduh ba sdang.
Haba phai sha kajingiakhun ha katei ka sngi, u Raikutshisha Buam u la ioh ban thep ia ka kol na kabynta ka Rangdajied ha ka minit kaba 20 jong ka kylla step ha shwa ba ka Langsning kaba la hap ban ialehkai tang 10 ngut kan ioh pat ban pynphai noh ha ka minit kaba kaba 78 lyngba u Ronnie Kharbudon.
Shwa jong kane ka jingiakhun, baroh ar kynhun ki don mar 21 point hynrei ha ka jingiakhun pat dei ka Langsning kaba ioh ban lamkhmat hadien ba ka la jop ia ka jingiakhun ha ka kylla kaba nyngkong da 2-1 kol kaba log ha ka 7 tarik u Naitung.
Kumta na katei ka jingiakhun kaba kut ha ka jingiakhaid mynne ka sngi ia ka kyrdan kaba ar laioh ban bat da ka Langsning ia mynta hi.
Ka jingiakhun la shai ka sngi Saitjain pat kan long hapdeng ka Mawlai kaba don ha khliehduh da ki 29 point pyrshah ia ka Ryntih kaba don 17point.
