Shillong, Jymmang 19: Ka kynhun ialehkai U 19 jong ka India, sa shisien ka la lah ban ioh bat biang ia ka nam kum ka lahduh hadien ba kila lah ban pynliem noh da 4 la 3 goal pyrshah ia ka Bangladesh ha ka final jong ka SAFF U19 Championship ha madan ïalehkai Golden Jubilee Stadium ha ka sngi U Blei.
Hadien ka jingia drawn ka jingialehkai kala shu kut noh mar shi goal, bad khatduh khatwai, ka India U19 ka la pyni ia ka sap ba tbit bad jop ia ka Bangladesh da 4-3 kol ha ki penalty.
Haba phai sha ka jingialehkai haba kut ka 90 minit ka India bad ka Bangladesh kala ia khaid da mar shi goal bad lyngba ka jingkyrshan ba radbah ki paidbah ka India ka lah ban lam khmat ha ka minit kaba ar lyngba u kapten Singamayum Shami ha shuwa ba ka Bangladesh kan pynïakhaid ha ka minit kaba 61 lyngba u Md Joy Ahamed.
Ha shwa ban kut ka 90 minit ka Bangladesh kala ioh biang ia kabu da kaba ioh shut penalty kaba la ai mynsiem shuh shuh ia ki nongkyrshan jong ka Bangladesh hynrei namar ka jingtbit u nongap goal u Md Ismail Hossain Mahin u la ioh ban iada ia ka ball ba la shut da u Roshen Sing bad dei dei ia u dieng goal.
Katba ki khynnah jong u Bibiano Fernandes ki khlem kthong, u rangialehkai ka Bangladesh u Nazmul Huda Faysal u la ioh ka lad ban shut hynrei ka ball kala leit dei ia u dieng goal bad kane kala pynheh mynsiem biang ia ki rangialehkai ka India, bad da ka buit ialehkai ba thymmai ka India kala pynkylla ia ka rukom ialehkai ban ioh thep goal katba u nongapkol u Suraj Singh Aheibam u la thep ha ka por ba donkam tam bad u la rynsied sha ka liang ka diang ban kyntait ia ka ball ban rung sha goal ba la shut da u Salahuddin Sahed.
Hadien wan mih sa u Captain u Singamayum Shami uba la ioh ban thep iaka goal ban pyniakhaid ha ka kylla miet, da ka jingjai jai haba shut ia ka ball u la ioh ban pynkhih jar biang bad kane kala pynbiang pura ia ka India ban long biang ka nongjop sa shisien.
U Md Mithu Chowdhury, Md Mursed Ali, bad u Md Joy Ahamed kila ioh ban thep goal na ka bynta ka Bangladesh, katba u Md Arbash, Rishi Singh, Jodric Abranches, bad u Shami kila ioh ban thep goal ia ka India.
