Silchar, Naitung 29 :Ki ba bun tylli ki kynhun seng lehnoh ba la ithuh bha ki la pyrshang ban pyniar ia ki ktem ki jong ki hapoh ka thain shatei lammihngi (Northeast) jong ka ri India.
Ia kane la pynpaw da u director general ka tnat pulit ka Assam, u Bhaskar Jyoti Mahanta hynnin ka sngi Palei. Kane ka jingkren ka jong u ka la wan long ruh hadien ka jinglapdien ia ki briew ki ba donkti bad ki kynhun seng lehnoh na ki bynta bapher bapher jong ka Assam naduh kine ki khyndiat sngi ba la dep.
Une u DGP ka Assam u la ong ruh : “Kine ki kynhun seng lehnoh, ka ba kynthup ia ka seng lehnoh ka pyrthei, ka Al Qaida mynta ki la pyndonkam ia ki sur ki jong ki ha ka ktien Bangla da ka jingthmu ban khring ia ki samla na ka jylla Assam.” “Kane ka dei ka jinglong jingman ka ba i ma shibun,” ong u Mahanta.
Watla katta une u heh pulit ka Assam u la ong ba ki samla na Assam ki la pynjngai ia lade na ki ba kum kine ki jingpyrshang da ki kynhun seng lehnoh.
Lah ban kdew ba ki bor pulit ka Assam naduh kine ki khyndiat sngi ba la dep ki la lapdien ia buntylli ki jingtreikam jong ki kynhun seng lehnoh ha ka jylla. Kine ki jingtreikam katkum ki pulit ka Assam ki dei ki ba don ka jingiadei bad ka kynhun seng lehnoh ka ba napoh Bangladesh, ka Ansarullah Bangla Team (ABT).
Halor kine ki jinglapdien, ki pulit ki la kem noh ia haduh kumba 10 ngut ki briew halor ka jingkynnoh donkti bad katei ka seng lehnoh napoh Bangladesh. Ia kine ki briew la kem na ki bynta bapher bapher ka jylla.
Katba ia hynniew ngut na kine la kem noh na Barpeta district, mar uwei ki la shah kem na Moirabari ka ba hapoh Morigaon district, n Guwahati bad na Bongaigaon. U briew u ba la shah kem na Moirabari u dei u ba pyniaid ia ka skul madrassa.
Na ka liang ki bor pulit ki la khangdam noh ruh ia ki katto katne tylli ki skul madrassa hapoh Moirabari ka ba hapoh Morigaon district. Nalor kata kumba phra ngut ki nonghikai jong ka skul madrassa jong ki kynthei ki la shah rah noh na ka bynta ban pynlong ia ka jingtohkit.
Ha ba kren halor kane ka bynta, u Myntri Rangbah (CM) ka Assam u Himanta Biswa Sarma u la ong “Ngi la lap ia ka jingdon bynta jong kine ki madrassa bad ki kynhun seng lehnoh ki ba dei napoh Bangladesh.” “Kine ki madrassa ki la ioh pdiang ia ka jingiarap pisa na kitei ki kynhun seng lehnoh ki ba don hapoh Bangladesh,” ong shuh shuh u CM ka Assam.
