Shillong, Lber 03: U Symbud Myntri Rangbah ba khmih ia ka kam Pohiing, Bah Prestone Tyndong ha ka sngi Nyngkong ula pyntip ba ka Sorkar kala pyrshang bun ki lad ban pynbeit ia ka kam iakajia pud haba pyniadon bynta lang ia ki nongialam shnong.
Haba jubab ia ka call attention motion hapoh ka Iingsorbar Thawain, u Bah Prestone ula ong ba ka Sorkar kala mang haduh 7 tylli ki border outpost kiba kynthup ia ka Rani-Jirang BOP ha Ri Bhoi district, Langpih BOP, Lejadubi BOP, bad Umwali BOP ha West Khasi Hills district, Mooriap BOP ha East Jaintia Hills, Tihwieh BOP bad Mukroh BOP ha West Jaintia HIlls, ban pynbeit bad peitngor ia ki kam iakajia ha khappud.
Nalor kane, ka Sorkar kala mang ruh haduh 9 tylli ki Police outpost ba thymmai ha Jylla bad kine ki kynthup ia ka Mawkynrew OP bad Mawjrong OP ha East Khas Hills, Kyrshai OP, Athiabari OP bad Malangkona OP ha West Khasi Hills, Barato OP ha West Jaintia Hills, Umpleng OP ha East Jaintia Hills, Rongsak OP bad Bawegre OP ha East Garo Hills.
” Ka Sorkar kala kut jingmut hok ban ai jingiada ia ka hok bad ka jingshngain jong ki paidbah ha khappud bad yn dang bteng ban shim ia ki sienkam ha kaban leh eiei halor ki jingeh ba ki mad” ula ong.
Halor ka rai jong ka Mukroh ban boycott ia ka elekshon KHADC ba dang shu dep, u Bah Prestone ula ong ba ki bor district ka West Jaintia Hills kynthup ki Tnad sorkar kila trei khlem shongthait ban pynthikna ia ka jingshong suk shongshngain ha ka thain. Ka jingtuklar jong ki ha ka por kaba dei ha kiba bun ki jingiakynad khlem pep kala khandlad ia ka jingpur jong kitei ki jingjia.
Namar kine ki jingpyrshang, ki paidbah ka Mukroh kila pynkylla ia ka rai bad mynjur ban iashimbynta ha ka elekshon, ula ong haba bynrap ba ki jingialang ialap elekshon ruh kila iaid beit iaid ryntih bad ia ka jinglong jingman la peit pyrman bha ban pynthikna ba kan neh ka shongsuk shongshngain ha ka thain.
U pyntip ba ka elekshon KHADC kaba la long ha ka 21 tarik Rymphang kala sakhi ia ka jingpoi thep vote ki paidbah ha Barator-Mukroh sha ka 84.63%.
“Kane ka jingkhein kala kren jam ia ka jingpyrshang bala shim ban pynthikna ba ki nongshongshnong ba sah ha khappud ki ioh ban thep vote” ula ong.
