Shillong, Jylliew 02: Ka kynhun ki shiphew tylli ki sengbhalang hynne ka sngi Nyngkong, ki la dawa na ka Sorkar Jylla ba kan pynsangeh noh ia ka rai ban aiti pyniaid sha ki riew shimet ia ka Tura medical college.
Ha ka kywroh ka kynhun sengbhalang kala ong “Namar kata, ngi kyntu ia ka Sorkar Jylla ban weng noh ia ka PPP model bad dei ban pynlong ia ka Tura Medical College kum ka College paidbah. Wat pyndonkam bakla ia ka jaka ba la ai da ka jaitbynriew Garo, sngewbha burom ia ka jingnoh synniang jong ki. Ki paidbah ka thain Garo Hills ki dawa ïa ka jinglong khuid, ka jinglong hok, bad ka jingburom ïa ka jingmyntoi jong ki paidbah, ym ïa ka jingmyntoi shimet. Ngin ym pdiang ïa ka rukom treikam kaba pynthut ïa ka lawei jong ki samla jong ngi ne ïa ka koit ka khiah jong ki paidbah.”
Kiba la soi ïa kane ka kyrwoh ba ïatreilang ki kynthup ïa ki riew rangbah, Mothers Union, Garo Students’ Union (GSU), Federation of Khasi-Jaintia & Garo People (FKJGP), ADE, A’chik Youth Welfare Organization (AYWO), Federation for A’chik Freedom (FAF), Garoland State Movement Committee (GSMC), A.chik Consciousness Holistically Integrated Krima (ACHIK) bad Post-Graduates Students Union (PGSU), NEHU campus.
Ka kynhun sengbhalang kala kdew ruh ba ka jingbhah kyrpang 50% kam pat biang.
“Ki samla pule ha Meghalaya ki donkam ym duna ia ka 85% ka jingbhah kyrpang iaki seat. Ngim kwah ban phiah ia ka hospital bad iaka College hapdeng ki kynhun bapher bapher kaba lah ban wanrah ia ka jingpyrshah bad jingkulmar. Kumjuh ruh, ki nongpang ki lah ban shah shim rem ka jingsiew lada ki mashin kiba kham tbit la pyndonkam da ki Company shimet. Kumba la kdew, lada ia ka College la pyniaid da ki kynhun shimet kan ai jingmyntoi ia ki doktor” kala pynpaw.
Kiba soi iaka shithi ki la kdew ruh halor ka jingkren dang shen jong u Myntri Rangbah ka Jylla u Conrad K Sangma ba 50% plus lane haduh 55% ki seat MBBS ha Tura Medical College yn buh kyrpang na ka bynta ki samla pule ka Meghalaya bad ia ki seat yn ai katkum ka State’s Reservation and Domicile Policy, kynthup ia ka notification vide No. da/ Ja8th122. 1972. Bad lada ka jingiakren ka iaid bha nangne shakhmat, ka Sorkar ka lah ban pynkiew ia ka jingbuh seat ia ki samla pule Meghalaya haduh 60%.
“Hynrei ka Expression of Interest (EoI) ba la pynmih da ka Directorate of Health Services (Medical Education & Research) ka kren shai ba tang haduh 50% na ki seat yn bhah kyrpang hapoh ka bhah jong ka Sorkar. Kane ka jingpyrshah ka pynmih ia ki jingsngewkhia kiba jur ia ngi. Kaei ka jingong kaba dei ban buh kyrpang tang na ka bynta 50-60% namar ha kiwei ki Jylla ki don ba buh kyrpang haduh 85%” ki la kylli.
Ki nongsoi ki la pynpaw shuh shuh ba ka Tura Medical College ka dei ka college kaba nyngkong eh ha Meghalaya. Ka dei ban long ka nuksa kum ka jaka pule kaba la pyniaid da ka Sorkar, thik kum ka Assam Medical College, Dibrugarh, Assam.
“Sa shisien, balei ba tang ïa ka Tura la ai ha ka PPP? Balei ba ym aiti ïa ka Shillong Medical College sha ki Company shimet. Balei leh shilliang. Ngi tieng ioh don ka jingiasuh buit ban leh shilliang iaka Tura Medical College. Balei ba ïa ka Garo Hills la leh pher”.
