Shillong, Jylliew 02: U working president ka National Peoples’ Party (NPP) bad Myntri Sorkar Marcuise N Marak hynne ka sngi Nyngkong, u la ong ba ka jingjied ia ki kyrtong sha ka Elekshon Garo Hills Autonomous District Council (GHADC) kan long katkum ka jingdon jingkyrmen ban jop.
Haba kren bad ki lad pathai khubor, u Marcuise u la ong ba ka party ka dang pynkhreh ia ka jingpynkhreh na ka bynta ka olekshon ha GHADC.
“Katto katne na ki kyrtong jong ngi ki la don lypa ban iakhun haka ilekshon MDC sha GHADC” la ong u Marcuise.
Haba ïadei bad ka jingïasoh dang shen jong ki 2 ngut ki MLA barim ryngkat bad ki nongkyrshan jong ki ha East Garo Hills, u Marcuise u la ong, “Kata ka dei ka jingpynshisha kumno ngi sdang (ïa ka jingpynkhreh) mynta.”
Haba kylli, u la ong ba ka party ka dang wad ia ki kyrtong thymmai.
“Hynrei ngin sa rai ban ai ia ki tiket jong ka party katkum ka jinglah jong ki kyrtong ban jop,” u la ong.
U working president u la ong ba ka party kan pyrshang katba lah ban ioh ia ka jingbun paid kaba pura ha ka ilekshon GHADC ka ban sa wan.
“Ngin leit sha ki paidbah bad katkum ka jingtreikam jong ngi jong ka party, ngin pan jingkyrshan na ki,” u la pynpaw.
