Shillong, K’Lyngkot 03: Ka Dorbar Shnong Urmasi-u-Joh, kala pyrshah jur iaka rai jong ka Khasi Hills Autonomous District Council (KHADC) bad dawa ban pyndam iaka hukum (order) ba ai jngithuh iaka shnong Mawsaw kum ka shnong ba thymmai.
Haba kren sha ki lad pathai khubor hynne ka sngi, u Sordar ka shnong Urmasi-u-Joh Bah Phaston Wankhar u la iathuh ba ka KHADC haka 13 tarik Nohprah 2024 kala pynmih iaka hukum (Order) bala ithuh iaka shnong Mawsaw kum kawei ka shnong thymmai.
Ula ong ba ka shnong Mawsaw ka dang hap hapoh u pud synshar shnong ka Urmasi-u-Joh bad kane ka jingai jingithuh jong ka KHADC ka dei kaba leh don bor iaka Dorbar Shnong Urmasi-u-Joh bad iaka Hima Khyriem.
U la ong ba iaka hukum (Order) ban ithuh iaka shnong Mawsaw kum ka shnong thymmai ka dei bala ai bor da u Chief Executive Member (CEM) ka KHADC Bah Pyniaid Sing Syiem bad u Deputy CEM Bah PN Syiem bad ia kane u CEM bad u Deputy CEM kila leh ban ioh jingmyntoi shimet naka bynta ka elekshon MDC ban wan.
“Ka Executive Committee jong ka Dorbar Shnong Urmasi-u-Joh kala dep lum ia ka jingialang ba kyrkieh halor kane ka kam bad la shim rai ban dawa iaka KHADC ban weng noh mardor iaka hukum (Order) ba ai jingithuh iaka shnong Mawsaw kum ka shnong thymmai” ong u Bah Phaston.
U Bah Phaston u la iathuh ba naka liang ka office u Syiem ka Hima Khyriem ruh u khlem pat ai No Object Certificate (NoC) sha ka kur Kharkongor ban ithuh iaka shnong Mawsaw kum ka shnong thymmai.
U la ong ba naka liang ka Dorbar Shnong Urmasi-u-Joh ka lah ban ujor sha ki bor jong ka ain, lada ka KHADC kam weng iaka hukum ba la pynmih haka 13 tarik Nohprah 2024.
 bad dawa ban pyndam iaka hukum (order) ba ai jngithuh iaka shnong Mawsaw kum ka shnong ba thymmai.){kind=link}