Shillong, K’lyngkot 02 : Ka Deputy Commissioner ka East Khasi Hills, kala khot ia ka jingialang jong ka District Level Committee, ban iatai halor ka jingtyra ban pynlong Yatra ki riewngeit Hindu sha krem Mawjymbuin.
Ia kane ka jingialang la khot ban pynlong ha ka 3 tarik Kyllalyngkot ha ka por 11 baje mynstep hapoh ka Ophis jong ka Deputy Commissioner, kaba dei ka Chairperson jong ka Committee.
Ka mat jong ka jingiakren ka long ban peit ia ka jingpynneh ia ka shongsuk shongsain, ka rukom pyniaid kam bad kiwei kiwei ki kam kiba iadei bad ka krem Mawjymbuin.
Ki dkhot jong ka Committee kiba la shah khot sha ka jingialang ki kynthup ia u Superintendent of Police ka East Khasi Hills, u Chief Engineer ka PWD (Roads). Divisional Forest Officer SF Division, u Member Secretary ka Meghalaya State Pollution Control Board (MSPCB), u Block Development Officer (BDO) ka Mawsynram Block, u Rangbah Shnong ka Dorbar Shnong Mawsynram bad u General Secretary ka Central Puja Committee, Meghalaya, Shillong.
Lah ban kdew hangne, ka Dorbar Shnong Mawsynram ha u snem bala lah, kala rai ban khang pyrshah ia ka jingwan leh niam jong ki riewngeit Hindu hapoh ka krem Mawjymbuin, kaba ki khein ia u mawjymbuin kum u Shivling ne uba ki mane kum u Blei Shiva.
Kawei ka seng Hindu na Assam bala tip kum ka Kutumba Surakshya Parishad (KSP) dang shen, kala pynsangeh shipor ia ka jingthmu pakhang ia ki surok ba wan sha Meghalaya hadien ba ka Deputy Commissioner kala khot iakren ia kane ka seng.
Kane ka seng kala byrngem ban pakhang ia ka surok sha Meghalaya naduh ka 24 tarik u Nohprah halor ka nongrim ba ka Sorkar kam shym la leh eiei ban pynbeit ia ki kynrum kynram, ka ban plie lad ia ki riewngeit Hindu ban lehniam ha krem Mawjymbuin.
