Pyrshah ka TUR ba thmu pynlong ka Sorkar da ka jingiaseng ban plie ia ka Cpt Williamson Sangma State University

Shillong, Kyllalyngkot 04: Ka Thma U Rangli-Juki (TUR) ka pynpaw ia ka jingpyrshah kaba jur ia ka jingkren laplah jong u Myntri ka Pule Puthi u Rakkam Sangma, ha kaba ula pynbna ba yn pynlong da ka jingȉaseng Khristan ha ka por ba plie ia ka Skulbah kaba nyngkong jong ka Jylla, kata ka Williamson Sangma State University, na ka daw ba ka Meghalaya ka dei ka Jylla Khristan.

“Ka jingkren jong u Myntri ka Sorkar Jylla ka long ka bym shongnia bad ka pynkheiǹ ia ki kyndon bad nongrim jong ka Riti Synshar ka ri. Nyngkong eh, ka Jylla Meghalaya ka lah ban dei ka Jylla kaba bun tam ki nongshong shnong kidei ki Khristan kiba don ha ki Balang Khristan kiba pher bad kiba ȉapher kawei na kawei pat. Hynrei ka jingbun paid kam lah ban pynlong ia ka Jylla kum ka Jylla Khristan bad ym lah ban pynkylla Jylla Khristan ia ka Meghalaya halor ka nongrim jong ka jingbun paid” la ong ka TUR ha ka kyrwoh khubor hynne ka Sngi Saitjain.

Ka TUR kala pynpaw ruh ba ka long kaei kaei kaba bakla bad be-aiǹ ban leh kumtei.
“Ka Jylla bad ki tnat treikam bapher jong ka Sorkar ne ka Ri kiba don ha baroh kawei ka Ri India kidei ki tnad ne ki bor treikam ki bym lah ban pynȉasoh bad kano kano ka niam ne ka jingngeit. Kine ki dei ban trei ne pynȉaid ia ki kam jong ki katkum ki kyndon jong ka Riti Synshar ka Ri India. Kumta ka jingkren jong u Rakkam Sangma, ka long pyrshah ia ka Riti Synshar” la ong ka TUR.

Ka TUR kala ong ruh ba ka Skulbah jong ka Jylla ka dei kaba la seng bad bei tyngka da ka pisa paidbah bad kumta kam dei ban pynȉasoh ne shah pynȉaid ha kano kano ka kynhun Niam ne Balang ne jingngeit lem kumta kan ym lah satia ban ai ki jinghikai kaba laitluid sha ki samla pule bad kan ym roi ne san lano lano ruh.

Hapoh ka Jylla Meghalaya ki don shibun ki Kynhun Balang ne Seng Niam ne Kynhun Jingngeit kiba pher bad ȉapher bad kine ki Seng ne Kynhun ki la im bad san hapoh ka Jylla, kaba kynthup ia ki Niam Tynrai, kum ki Sonsarek, Niam Tre bad Niam Khasi.

“Ka jingkren jong u Rakkam Sangma ka dei ka jingkheiǹ dewthala bad ka jingbymsuidǹiew ia kine ki Kynhun Jingngeit ne Niam kiba don ki juh ki hok katkum ka Riti Synshar jong ka Ri. Ka wanrah ruh ia ka jingsngewȉapher kaba lah ban ȉalam sha ka jingȉapait hapoh ki jaitbynriew trai ri kiba don ha Meghalaya” ong ka TUR.

“Ka shai kum ka sngi ba ka Sorkar Pdeng hapoh ka jingȉalam jong ka BJP ka pyrshang ban pynsngewthuh bakla bad leh ki kam ban pyni ba kam don ka jingȉapher lane ba kam don kano kano ka jingmynsaw ban leh ia kino kino ki kam ne ban pynȉasoh ia ki kam Sorkar ne ki tnat treikam jong ka Sorkar bad ka Niam ne ki jingleh Niam jong ki heh paid Hindu. Hooid, pylleiǹ pylleiǹ ngi sakhi ba ki pukir, ki lyngdoh niam jong ka Niam heh paid Hindu ki iashim bynta bad pynlong ki jingdwai ryngkat ka kǹia ka khriam da ka rukom jong ka Niam Hindu ha ka por ba plie ia ka Ȋing Dorbar Thaw Aiǹ ne ka Parliament kaba thymmai. Kane kam mut pat ba hangne ha ka Jylla Meghalaya, ka Jylla kaba bun tam ki Khristan, ngi lah ban leh kumjuh da kaba pynlong da ka jingȉaseng ne jingdwai Khristan ha ka por ba plie ia ka Skulbah ne ha kiwei pat ki prokram ba pynlong da ka Sorkar” la pynpaw ka TUR.

“Ka aiǹ tynrai jong ka Synshar Paidbah bad ka dak ba kum ka Jylla ngi lah ban pynpaw ba ngi la san bad khraw mynsiem ka long ba ngin kyntait ia ki kam ne ki saiǹpyrkhat jong ki kynhun ne ki riew shitniam, ym ban ȉabud ne leh kumjuh. Kaba sngewsih ka long ba u Rakkam Sangma u bud thik ne pyrthuh ia kaei ba ka Sorkar BJP ka leh ha kaba ka pyrshang ban thombor da ka jingngeit ne ka niam Hindu ha kylleng ka Ri India” la kynnoh ka TUR.

Ka TUR ka pynpaw bad pynkynmaw ba u Rakkam Sangma, kum u Myntri u la bam smai ban pynneh bad ȉada ia ka Riti Synshar bad ia ki nongrim tynrai jong ka. Kumta ka jingkren jongu kala pynkheiǹ ia ki kyndon ka Riti Synshar.

“Ka jingthmu ban pynlong da ka jingȉaseng Khristan ha ka sngi ba plie ia ka Skulbah kadei ban sangeh shi syndon bad u Myntri u dei ban shim biang ia ki kyntien ba ula khlei bad pan map na ki nongshong shnong ka Jylla” la dawa ka TUR.

Ka TUR ka khot ka wer ia ki nongshong shnong bad kumjuh ki seng bhalang bad ki seng saiǹ hima ban pynrem ia ka jingkren shitniam jong u Rakkam Sangma bad ba ngin ȉatrei lang ban ȉada ia ka Riti Synshar bad ki nongrim jong ka.