Pyrshah ka TTAA iaka jingkhang kali Tourist ka AKMTA | Byrngem khang rung ia ki kali Tourist na Meghalaya

Shillong, Nailur 07 : Ka Tourist Transporter Association of Assam (TTAA) kala pynpaw ia ka jingpyrshah jur ia ka jingthmu ban khanglad ia ki kali kiba na Assam ban leit kamai sha ki jaka jngohkai kiba don ha Meghalaya bad kala byrngem ba lada pyntreikam ia kum katei ka jingpyrkhing, kumta ka United Body of Transporters na Assam ka lah ban khang syndon ban wan kamai sha Meghalaya.

“Lada ka All Khasi Meghalaya Tourist Taxi Association (AKMTA) kan bteng ia katei ka jingpyrkhing ki kali Assam ban leit sha ki jaka jngohkai kiba pawnam, ka United body of Transporters na Assam (Motor Paribahan Sanmilita Sewakarmi Mancha, Assam) kala rai ban pynsangeh noh shi syndon ia ki kali ban leit kamai sha Meghalaya. Ha kum katei ka khyllipmat, wat ki kali kiba na Meghalaya ruh kin shah khang pyrshah ban leit on ne leit shaw ia ki briew sha Guwahati Railway Station ne Airport bad ka Association kan ym shah ruh ia ki kali kiba kit ia ki marbam mardih bad ia ki mar kiba kongsan ban leit sha Meghalaya, nuksa kum ki marbam/ki trok kit ia ki mar kiba kongsan, ki Petroleum Tankers bad kiwei kiwei. Kane ka jingkhang lynti kan ktah jur bha ia ka Meghalaya kaban kylla syndon kum ka jaka kaban ym don ki nongjngohkai kiban wan, kane dei ka jingmih kaba yn ym don kiba lah ban pdiang bad kaban ktah ia baroh kiba donbynta lang” la pynapw ha ka TTAA ha ka kyrwoh khubor.

Ka kynthoh ruh ba ka jingdawa ka AKMTA ka long ka bym don Nongrim bad kaba khwan myntoi shimet ialade, ka TTAA kala ong, “Kane ka jingdawa kala mih ia ka jingiania namar ba kine ki kali tourist na Assam ki don ia ka permit kaba biang, kynthup ia ka permit ban kamai ha ki 3 tylli ki jylla Assam, Meghalaya bad Arunachal Pradesh, bad don ruh kiba don ia ka All-India Tourist Permits bad kila noh synniang bha sha ka khajna jong ka jylla Meghalaya. Katkum ka ain hi, kine ki kali ki lah ban kamai ban kit ia ki nongjngohkai sha ki jaka jngohkai kiba don ha Meghalaya.”

Ka Association kala kdew ruh ba ia ka nuksa jong ka Sikkim yn ym lah ban pyntreikam ha Meghalaya namar ka ‘constitutional’ bad ‘geopolitical differences’ ha kaba ka Article 371F bad ka jingbym long shngain ha khappud kum ka jingjia ha Sikkim ka long kaba kham kyrpang.

“Ngi lah sakhi ba u Balajied Jyrwa (All Khasi Meghalaya Tourist Taxi Association) u dawa ia kajuh ka rukom treikam kaba iasyriem bad ka Sikkim. Hynrei ka long pat kaba kongsan ban sngewthuh ba ka jinglong jingman ha Sikkim ka long kaba pher bha na ka bynta ka sorkar India namar ka jingdon bad jingling jingman ka jaka bad khamtam haba ka don ha khappud bad ka ri Bhutan, Nepal bad Tibet (China). Ka Article 37 IF jong ka riti synshar ka ri ka ai ia ka kyndon kaba kyrpang ia ka Sikkim, ban pynthikna ban ai jingiada ia ka hok jong ki trai ri trai muluk. Ka kyrdan jong ka Sikkim kum ka nongiaida ia ka India ha u 1950 bad ka jingling kum ka jylla ha ka ri India ha u 1975 kala nang pynkhlain shuh shuh ia katei ka kyrdan kaba kham pher, ia kaba ym lah ban pyniasriem bad kiwei pat ki jylla kynthup ruh ia ka Meghalaya,” kala omng bad ka ai jingmut ba ka Meghalaya kadei ban thaw shwa ia ka tourism policy kaban burom ia ka permit kaba la ithuh da ka ain bad ban pynshlur ia ka jingiatreilang ha ka thain ym ban kiar na kiwei.

Ka association ka sheptieng ba kane ka jingkhang lynti kan lam sha ka jingthud ia ka kam jngohkai, kaban iasyriem bad kaei kaba la jia ha Jammu bad Kashmir hadien ba kala mih ka kam thombor bad kala pynpaw ba ka kam jngohkai pyrthei ka ieng ban don ia ka jingsuk, jingiatreilang bad ka jingia burom mar kylliang bad kano kano ka jingleh kaba pynthud ia kiwei kan buh ha ka jingma ia ka khaii pateng.

Ka TTAA kala pynapw ba ki kali kamai na Assam kila kamai katkum ka jingdon ia ka permit kaba biang bad ka jingkhang lynti ia ki ban wan kamai shaki jaka jngohkai ka Meghalaya, kan long kum ka jingpynkhein ia ki kyndon jong ka sorkar pdeng bad kan long ruh kum ka jingniew poh ia ka rukom kamai kaba la ithuh da ka ain.

Ka association kala byrngem ba ka jingpynthud ia shilliang ka kjat ia ka tourism circuit kan pyntroin syndon ia ka circuit baroh kawei, kaban lam sha ka jingpynsangeh lut bad ka jingduh ia ka kamai kajih da ki hajar ngut.

Ka TTAA kala kyntu ia ka sorkar Meghalaya ba kadei ban kiar ban shim lang ia kum katei ka rai kaba lah ban pynsniew syndon ia ka kam jngohkai ha ka thain bad ka pynapw ba ka nam jong ka Meghalaya kum ka jaka jngohkai kaba pdiang ia ki nongjngohkai kan shah pynjulor noh lada ki nongjngohkai ki mad ia ki jingshah pynthud ha ka leit ka wan ka jongki”.

Kala pynpaw ruh ba ki nongpyniaid kali na Assam kila kyntiew bha ia ka Meghalaya ha ka kam jngohkai la ka long ha ka rynsan jong ka ri ne shabar ri, kumta ka jingkhang ia ki ban wan, kan pynduh bad pyntroin shi syndon ia ka jingbei bad ka jingtrei shitom kaba la bun phew snem.