Shillong, Nailur 28: Ka Elaka Narpuh Youth For Change kala pynpaw iaka jing pyrshah ban pynlong ia ka Public Hearing jong ka Star Cement Meghalaya Limited (SCML) ban tih mawshun, kaba la tip kum ka ‘Brishyrnot Limestone Deposit -II ha ka shnong Brishyrnot, Elaka Narpuh, East Jaintia Hills.
Katkum ka kyrwoh na katei ka seng, kila pynpaw ba ki daw ba ki ieng pyrshah ban tih mawshun ha katei ka jaka kadei namar ba ka jaka kaba mut ban tih mawshun kaba heh haduh 65 Hectares ha Brishyrnot, ka long ka jaka kaba iajan bha bad ka Wah Lunar kumba 20-30 metre bad lada shah ban tih mawshun ha kane ka jaka kan long ka jingtim ia ka mariang namar ka Wah Lunar kan rngad noh bad ka Wah Lukha kaba jngai kumba 500-600 metre na kane ka jaka kan mad ruh ia ki jngeh kumba mad ka Wah Lunar.
Kila ong ruh “Ka Star Cement LTD kadei ka karkhana shandewbilat kaba heh tam hapoh ka thaiñ shatel lammihngi kam juh khein snep ia ki briew jong ka Elaka Narpuh bad barabor kam juh aikam ia ki trai shnong bad ia ki trai Elaka Narpuh bad kiba ioh ban trei ha kane ka Company ki long tang kito kiba iajan bad ka Company bad kam juh ai ia ki Post ne kyrdan baheh sha ki trai Shnong bad trai Elaka, bunsien ka ai tang ia ki post Grade IV kum ki Cleaner, Peon, Gardener, Driver bad kam juh ai ia ki kyrdan baheh sha ki trai shnong nalor ba mynta bun ki trai shnong kila long kiba bit ba biang ha ki pule puthi kum ki Engineer, M.Com, MBA”.
Ki nongialam kane ka kynhun kila ong,” Ka jingwan bad ka jingdon ki Company hapoh Elaka Narpuh ka long tang ka jingtim ia ki khun ka Elaka namar ki shu kamai spah bad kim juh burom ia ki trai Shnong trai Elaka bad bunsien tang ia u dewbilat ruh kim ai ia ki trai shnong ne trai elaka ban shna iing ruh.
“Ki Company kiba don ha Elaka Narpuh khamtam ia ka Star Cement ka pyndonkam da ka rukom treikam kaban pyniapait iapra ban ioh synshar khnang ban suk ban pyntrei bad pyniad ia ka Company jong ka” la kynnoh ka Elaka Narpuh Youth For Change.
Kila ong ba lada ailad ban tih mawshun ha Brishyrnot kan ktah ia ka Wah Lunar bad Wah Lukha bad khamtam ia ka Narpuh Wildlife Sanctuary bad ka Narpuh Reserved Forest. Kan ktah ia ka lyer kaba mih na khlaw na btap Narpuh Reserved Forest bad yn ioh pynban da ka Carbon dioxide ia ki nongshong shnong. Kan ktah ruh ia ki dohim dohwah kiba don ha Wah Lukha bad kan long ka jingtim ia ki briew kiba im ja da kaba khwai ha Wah Lukha.
“Katkum ka jingkular jong ka Star Cement ka long ban aikam ban aijam ia ki traishnong bad Elaka bad lada peit ia ka Meghalaya Industrial policy Act ka long ba ki trai jylla kidei ban iohkam haduh 60% hynrei katkum ba long mynta ki trai shnong trai Elaka kiba trei ha Star Cement ki long tang 20% bad 80 % kidei ki bar jylla” kala bynrap bad ka pynpaw “Na kitei ki daw ka Elaka Narpuh Youth For Change kan pyrshah jur ia ka Public Hearing jong ka Star Cement kaban long ha ka 08/10/2024 ha ka por 11 baje mynstep ha Brishyrnot bad lyngba kane ka kyrwoh ka khot ka wer ia ki paitbah ka Elaka Narpuh bad ki sengbhalang kiba don ha Ri Khasi Jaintia ban pyrshah jur ia kane ka Public Hearing jong ka Star Cement khnang ba kan ym long ka jingtim ia ka pateng ban wan”.
 ban tih mawshun, kaba la tip kum ka 'Brishyrnot Limestone Deposit -II ha ka shnong Brishyrnot, Elaka Narpuh, East Jaintia Hills.){kind=link}