Shillong, Nohprah 19 : Ki paid Garo na Ri-Bhoi District kiba don hapoh ka lama jong ka All Ri-Bhoi Garo Headman Association, hynne ka sngi nyngkong, kila pynlong ia ka rally ha Rangsakona ban pyrshah jur ia ka hukum jong ka Hima Mylliem ban nym ai jingithuh ia ki Rangbah Shnong ka Them Ri-Bhoi kiba dei ki jaidbynriew Garo.
Ki paid Garo kila dawa ruh ia ka Hima Mylliem b aka dei ban ai sanad noh ia ki Rangbah Shnon gjong ki 56 tylli ki Shnong Garo kiba don ha Ri-Bhoi District.
Lah ban kdew hangne ba kane ka jingiakhih kala mih hadien ba ka Hia Mylliem kala phah ia ka jingthoh sha u Deputy Commissioner ka Ri-Bhoi ba bthah ba um dei ban pdiang ia kano kano ka No Objection Certificate (NoC) lane ki kot pata khyndew bala ai da ki Rangbah Shnong Garo.
Ki paid Garo ha ka rally kila rah ia ki banner bad ki placard kiba don ia ki jingthoh kiba pyrshah jur ia ka hukum jong ka Hima Mylliem.
U Nickel R Marak, Adviser ka Association bad u John R Marak, kila pyntip ha kane ka rally ba kin sa nang iai bteng ia kane ka jingiakhih ha ki sngi ban wan lada ka Hima Mylliem bad ka KHADC kim ai jingithuh noh ia ki Rangbah Shnong Garo.
Kila ong ba ki paid Garo ruh ki dei ki riewlum jong ka Jylla bad ki don ka hok ban shongshnong ha kano kano ka bynta jong ka Jylla bad ban leh iala ka jong ka deity tynrai bad ban pynneh ia ka snap kyrpang kumba la pynkupbor da ka riti synshar ka Ri India hapoh ka Sixth Schedule.
Kila pyntip ruh ba shen kin sa phah da ka jingthoh sha ka KHADC, Hima Mylliem bad u Syiem ka Raid Marwet ba kyrpad ban pynkupbor ia ki Rangbah Shnong Garo bad ban tehkyndon ia ka jingtreikam jong ki kat kum ka customary law.
Ki ong ba lada kane ka jingdawa kam urlong, kin sa pynlong ia kiba bun ki jingiakhih tad haduh ban da ioh iala ka jong ka hok bad ka jingithuh kum ki Jaidbynriew Garo ha Ri-Bhoi District bad ha ka Jylla baroh kawei.
