Shillong, Nailar 03 : Ka Federation of Khasi Jaintia & Garo People-Upper Shillong Circle kala pynpaw ia ka jingpyrshah kaba jur ia ka jingthmu jong ka Sorkar ban pynkynriah ia ka Anjalee Petrol Pump sha Upper Shillong, da kaba ai bujli ia ka jaka jong ka Tnad Animal Husbandry & Veterinary.
Kane ka Kynhun Sengbhalang kala leit iakynduh markhmat ia u Myntri ka Tnad Animal Husbandry Bah A.L.Hek bad aiti ruh ia ka dorkhas kaba pynpaw ia kane ka jingpyrshah.
Haba iakren bad ki nongthoh khubor, u President ka FKJGP-Upper Shillong Bah Kitboklang Nongphlang ula iathuh ba ka seng kala ioh ia ki jingtip ba kala don ka jingleit sorjamin jaka sopsop hapdeng ka Tnad Animal Husbandry bad ki trai jong ka Anjalee Petrol Pump ha Upper Shillong ban ioh pynkynriah noh ia kane ka petrol pump nangne na nongbah Shillong.
“Ngi la ioh jingtip baka sorkar jylla ka don jingthmu ban ai jaka ban tei thymmai iaka Anjalee Petrol Pump sha Upper Shillong kaba dei ruh ka jaka jong ka tnat Animal Husbandry and Veterinary naka bynta ban pynkylluid iaka surok ha Shillong” la ong u bah Kitbok.
U bah Kitbok ula ong baka seng kam pyrshah ban pynkynriah iaka Petrol Pump sha kawei ka jaka hynrei ka seng kan ieng pyrshah ban ai jaka ha Upper Shillong namar ba ka seng ka sngew ba dang donkam iaka tnat Animal Husbandry and Veterinary ban tei iaki ophis ki ban kyntiew iaka kam ri jingri.
Haba kylli, u bah Kitbok ula iathuh na naka liang u Myntri ula pyntip ba ia kane ka kam la peit hi daka tnat Urban Affairs ka ba la shu bthah iaka tnat Animal Husbandry and Veterinary ban peit jaka ha Upper Shillong.
“Ka seng kan sa buddien ia kane ban pynthikna ba ki bar jylla kim dei ban ioh jaka khamtam ha Upper Shillong . Ka Seng kan sa iakynduh ia u Myntri Rangbah ka jylla ban pynpaw iaka jingpyrshah halor kane ka jingthmu” ula ong.
Pule ruh: Suba shah leh beijot bad shah pyniap dusmon ka Khynnah 12 snem
