Shillong, Nailar 03 : Ki Pulit ka Nongbah Shillong kila iohkem ia uwei u briew uba suba donkti ha kaba shoh dusmon bad lute ia iwei I Longkmie bala 70 snem ka rta ha Umsohsun.
Ki Pulit ka Shillong Sadar Police Station, kila ioh pdiang ia ka ejahar ha ka 30 tarik Naitung ba pyntip ba ha ka 29 tarik, uwei u briew bala tapdurkhmat ula rung jubor ha ka Iingsah I kong Janaki Toi ha Umsohsun bad ula shoh ia i shuwa ba un knieh ia ka sati ksiar, ka ATM card bad ka mobile phone.
Ha ka jingtohit, ki Pulit kila shem ba uwei u briew na Mawblei u dei uba la suba donkti ban leh ia kane ka kam, ong u Superintendent of Police ka East Khasi Hills ha ka sngi Palei.
U iathuh ba ha ka 1 tarik Nailar, ki Pulit kila leit khynra ia ka iingsah jong une u briew bad iohbat ruh ia u. U iathuh ba ha ka jingtohkit, une u briew ula phla ia ka jingdonkti ban leh ia kane ka kam bymman haba pyntip ruh ba ula dep ban die ia ka sati ksiar sha uwei u nongshna ksiar ha Mairang.
Ki Pulit kila kurup noh ia kane ka ksiar bad kem ruh ia une u briew. Ka jingtohkit mynta kala iaid shakhmat.
