Jowai, Naitung 09 : Palat 90% ki Shnong ka West Jaintia Hills District, kila pynpaw ia ka jingpyrshah ban pynkylla thymmai ia u pud u sam jong ki constituency ka Jaintia Hills Autonomous District Council (JHADC).
Kane ka sur kala mih na ka public hearing jong ka Delimitation Committee ka JHADC kaba la long hynne ka sngi ha District Library Auditorium, Mynthong, Jowai, kaba iakren halor ki 16 tylli ki constituency ka West Jaintia Hills.
Kine ki constituency ki kynthup ia ka Amwi-Khliehtyrshi, Mukhla-Ummulong, Moodymmai-Nongkhroh, Wahiajer-Kyndong, Moodop–Umladang, Mynso-Nongjngi, Mynsngat–Khanduli, Shiliangmyntang-Namdong, Barato-Mukroh, Mowtyrshiah–Saphai, Sahsniang-Mowkaiaw, Raliang, Shangpung, Jowai – North, Jowai–Central bad Jowai–South.
Namar ka jingpoi bun palat ki paidbah, ka Committee kala shah tang ia ki Rangbah Shnong bad ki Secretary Shnong ba kin pynsngew iala ki jong ki jingsngew bad ki jingai jingmut.
Palat 90% na ki shnong kila pyrshah ia ka draft delimitation (pynkylla) jong ki constituency namar ki jingjngai ki shnong bala kha la pun ia ki, kiba shimpor kumba 2 kynta ban leit ban wan.
Katto katne na ki jingpyrshah ka dei namar ka daw ba ki shnong jong ki, ki hap ha kawei ka Administrative Block katba ha ka draft pat la pynhap ha ka Block kaba iapher. Don pat kiba pyrshah ba ia kane ka jingpynkylla constituency la leh khlem da iasyllok bad ki Nongkitkam Shnong.
Katto katne ki shnong kila byrngem ruh ba lada pyniaid shakhmat ia ka jingtyrwa ha ka draft, kin nym iashimbynta satia ha ka elekshon MDC ban wan. Kila byrngem ruh ba kin nym shah ban buh ia ka polling station ha ki shnong jong ki bad don ruh kiba byrngem ba kin leit kiew sha Iingkashari ban ioh ia ka jingbishar kaba hok.
Tang katto katne ki shnong kiba la pdiang ia ka draft delimitation.
Ka Committee kala kyrpad ia ki paidbah ba kin phah ia ki jingsngew jong ki hapoh ka 3 baje janmiet jong ka 19 tarik Naitung haba iadei bad kane ka kam.
