Shillong, Jymmang 05: Ka Kynhun Myntri kala rai ba kano kano ka jingpynkiew dor biang ia ki projek sorkar kaba long palat ia ka 25% mynta ka dei shwa ban ioh ia ka jingmynjur na ka Kynhun Myntri, ban pynkut noh ia kaei kaba la leh naduh mynshwa ha kaban ai jingbit da ka tnad Pla Tyngka marwei, ong u Myntri bad Nongaiktien ka Sorkar MDA Bah Wailadmiki Shylla hynne ka sngi Baar.
“Kumba baroh ki tip, namar ba ha ki por kiba mynshwa kaei kaba la jia ka long lada ka don kano kano ka jingpynkiew dor, ka tnad ka ju rah ia kane sha ka tnad pla tyngka ban ioh ia ka jingmynjur. Hynrei mynta, ka kynhun myntri kala rai ba kano kano ka jingpynkiew dor kaba palat ia ka 25% dei ban ioh shwa ia ka jingmynjur na ka kynhun myntri” ong u Bah Shylla haba iakren bad ki nongthoh khubor.
Ula ong, ba kane ka kyndon kaba thymmai kala treikam ha kaba iadei bad ka jingshna ia ka Indoor Stadium ha Jongsha. Ia kane ka project la pynwandur nyngkong ha Pomlakrai hynrei hadien la pynkynriah noh sha ka Madan Khon Jongsha.
“Kumjuh hangne ruh, ka indoor stadium ha Jongsha, namar ha kaba sdang, ngi lah dei ban tei ia ka ha Pomlakrai. Hynrei kala don noh ka jingpynkynriah sha kawei pat ka jaka” ong u Bah Shylla.
Ka jingtrei ia ka kam kala iar bha namar ka jingdonkam kaba iadei bad ka National Games, ula ong. Ka jaka kaba la mut kala kiew na ka 12,031 sq meters sha ka 15,417 sq meters.
“Ha kajuh ka por, ngi lah shim ba namar jong ka National Games bad kiwei kiwei, kumta ki lah don bun ki jingkylla, ka jaka kaba la thmu nyngkong ka dei kaba long 12,031 sq meters, hynrei kala kiew noh sha ka 15,417 sq meters. Kumta ka jingpyntrei ia ka kam ruh kala kiew bha” ula ong.
Kumta, ka jinglut jong kane project kala kiew na ka T.22.75 Klur sha ka T.35.40 Klur.
“Dei halor kane ba ka jinglut jingsep kala kiew na ka dor kaba nyngkong na ka T.22.75 Klur sha ka T.35.40 Klur” ong u Bah Shylla.
