Shillong, Jymmang 05: Ka kynhun Myntri Sorkar ha ka sngi Ba-ar, ka la mynjur ban pynjlan ia ka samoi treikam jong ki 3 ngut ki heh ophisar bad mynjur ia ka amendment ka forest transit rules bad iaka service rules jong ka Meghalaya Drug Testing Laboratory, ong u nongaiktien ka Sorkar MDA u Bah Wailadmiki Shylla.
Haba kren sha ki lad pathai khubor u Bah Wailad u la ong ba ka kynhun Myntri Sorkar ka la mynjur ban pynjlan ia ka samoi treikam jong u Ram Mohan Mishra, retired IAS bad Executive Chairman jong ka Meghalaya State Investment Promotion Board.
Kala mynjur ruh ban pynjlan ia ka samoi treikam jong u bah Hector Marwein retired IAS bad Additional Chief Secretary ka Sorkar Meghalaya uba bat ruh kum u Chairman jong ka Meghalaya Sustainable Development Council.
La pynjlan ruh iaka samoi treikam jong u Bah Kynphambor Wahlang uba dei u Superintending Engineer ka tnat Directorate of Urban Affairs.
Ka kynhun Myntri Sorkar ka la mynjur ruh ban pynkylla ïaka transit rules hapoh ka Sections 40 bad 41 jong ka Meghalaya Forest Regulation, 1973, pule ruh Assam Regulation No. 7 jong 1891, kumba la pdiang bad pynkylla da ka Jylla Meghalaya.
Nalor kane ka kynhun Myntri Sorkar ka la mynjur ban pdiang ia ki kyndon service rules for officials of the Meghalaya Drug Testing Laboratory.
