Shillong, Nailur 26: Namar ka lehniam Durga Puja 2025, ki Pulit pyniaid kali Shillong Traffic Police (STP) kila pynbna ba kan don ka jingpyrkhing iaid kali naduh 28 tarik Nailur haduh 2 tarik Risaw 2025.
Ka hukum na u Superintendent of Police (Traffic) East Khasi Hills ka kdew ba yn nym shah iaki kali heh lane Heavy Motor Vehicles (HMVs) ban rung sha ki bynta ka nongbah Shillong naduh 29 tarik Nailur haduh 2 tarik Risaw naduh ka por 07:00 baje janmiet haduh 11:00 baje mynmiet .
La pynbna ruh ba bun ki surok ban rung shaki jaka lehniam lane Puja Pandals ki dei ki No Entry Zones naka bynta ki kali riewshimet bad iaki kali yn phah iaid noh shawei.
Ka tnat STP ka kyntu iaki paidbah ban pynieng iaki kali haki jaka bala ithuh lane ki Parking Zone, yn nym shah ban pynieng kali haki surok bad kino kino kiba pynkhien iaka ain kin shah pynshitom, ki kali kiba pynthut iaka jingiaid ki kali kin shah kit (Towed) shaki jaka bala ithuh bad ki trai kali kin hap ban siew.
Nalor kane ki Pulit kin pynlong ruh ka jingtalasi haki katto katne ki jaka ban tehlakam iaka jingniah khlem akor bad niah hapdeng ka jingbuaid.
La kyntu iaki paidbah ba leit shaki Puja Pandal ban iaid khnang ban lait naka jingdheng kali, bad la kyntu ia baroh ban punduna ka jingiabun briew bad ban bud ryntih iaki jingbthah ki bor District bad Pulit.
Lada donkam kyrkieh ki paidbah ki lah ban phone haki number 112 Emergency, Laban Traffic Branch- 69093-96411, Laitumkhrah Traffic Branch-69093-96412, Rynjah Traffic Branch- 69093-96413, Lumdiengjri Traffic Branch-69093-96414, Sadar Traffic Branch- 69093-96415, Madanrting Traffic Branch- 69093-96416 bad Mawlai Traffic Branch- 69093-96417.
 kila pynbna ba kan don ka jingpyrkhing iaid kali naduh 28 tarik Nailur haduh 2 tarik Risaw 2025.){kind=link}