Shillong, Nailar 19 : U Myntri Rangbah ka Jylla Meghalaya u Conrad K. Sangma ha ka sngi Nyngkong, u la pynurlong ia ka jingkular jong u Kpa (L) Purno A Sangma, ban plie ia ka Degree College hapoh ka shnong Rongjeng, East Garo Hills District.
Kane ka college ka dei ka Rongjeng Model Degree College kaba u Myntri Rangbah ka Jylla ula plie hynne ka sngi ha ka jingiadonlang u Myntri ka Tnad Pule Puthi Rakkam A Sangma, u MLA ka thain Jim Sangma bad kiwei kiwei ki riew pawkhmat.
Ha kane ka jingplie, u Conrad u la kdew ba ka jingthaw ia kane ka kolej ha Rongjeng ka dei ka jingpyndep ia ka jingkular jong u Kpa (L) Purno Agitok Sangma sha ki paidbah ka thain. U la pynbna ruh ba ïa ka Rongjeng Model College yn ain am ha ka kyrteng jong u Purno Agitok Sangma.
Ia kane ka College la bei tyngka na ka RUSA 2.0 kaba dei ka skhim na ka tnad pule puthi jong ka sorkar India. Ia kane ka jingtei la shna ha ka jinglut kaba Rs. 12 klur tyngka. Ka jinghikai jong kane ka degree college kan sdang mynta u snem da ka Arts stream.
U Myntri Rangbah u la pyntip ba ka Sorkar kala dep ai jingmynjur ruh ia ka song pisa ban
pyntrei ia ki surok kiba pyniasoh shaduh ka college, ka jingpynioh umbam umdih, bad kiwei kiwei ki jingdonkam, ki bym dei kiba la mang lang ha ka jingshna ia ka college. U pyntip ia kine ki kam ba donkam ym sa pyndep noh shen.
U Myntri ka tnad pule puthi Rakkam Sangma bad u MLA u Jim Sangma, ki la ai ka jingiaroh ia ka jingiohi jngai jong u (L) P A Sangma na ka bynta ki paidbah ka Rongjeng.
