Pylliat u CM ia ka Climate Adaptive Project
Shillong, Lber 07 : U Myntri Rangbah ka Jylla Conrad K Sangma ha ka sngi Palei, ula pyllait paidbah ia ka project ba bei tyngka na shabar “Ka Climante Adaptive Community Based Water Harvesting Project” ha ka jingialang kaba long hapoh State Convention Centre, Shillong.
Ka jingthmu jong kane ka project ba la mang T. 21 klur ka long ban shna ia 532 tylli ki pukri pyllang um ne ki reservoirs, ha ka jaka pondage ba 350 hectare, 2500 hectare ha ki common area bad 12500 hectare ha ki catchment area.
Ka jingpyntreikam ia kane ka project kan pynthikna ia ka jingpahuh ka umbam umdih ia ki shnong ki thaw bad sam um ruh sha ki jaka rep. Kan ai jingmyntoi haduh 72,000 ngut ki nongshongshnong kynthup ki jingsumar ia ki catchment area bad ruh ki kam kamai jakpoh.
U Myntri Rangbah ula pyntip ba ha kane ka prokram ba mynta ka sngi, haduh 36 tylli ki shnong la dep ban ithuh ba kin iada bad tyngkai ia ki pukri um bad ka song pisa ba T. 7 klur la pyllait sha ki ba kin pyntreikam ia ka project.
Haba pynpaw ba ka model jong ka Meghalaya ban tyngkai ia ka um lyngba ki sienjam bapher bapher, ka dei kaba la ioh jingiaroh na ka Ministry ka Jal Shakti, ka Sorkar India, u Myntri Rangbah ka Jylla ula ong “Ka Meghalaya ka dei kawei na ki Jylla ba nyngkong eh hapoh ka Ri kaba la pyntrei ia shibun ki kam ban tyngkai ia ka umbam umdih. Ka tnad PHE, Water Resource bad ka Soil & Water Conservation kila iatrei ryngkat ryngkat ha kiba bun ki project, kuba kot ia ka T. 8000 klur”.
Ula ong ba ki don katto katne ki project kiba dang iaid ha ka jingpyntreikam bad bun na kine ki project kila mih da ka jingthmu ban tynrai, pynkhid bad iada ia ki tyllong um bad jingrben biang ia ki dieng ki siej ha ki catchment area.
Haba kren halor ka jingsngewhia ia ka jingkylla ka mariang, u Myntri Rangbah ula ong ba ka Jylla kan hap ban pynkhreh bad ka Sorkar kala shim ia ki sienjam ba donkam ban pynduna ia ki jingktah jong ka jingkylla ka mariang.
Ula pyntip ruh ba ha ka taiew ban wan, ka Sorkar kan sa buh ruh ia u maw nongrim jong ka Water Supply Project bah eh duhha New Shillong Townshop ka ban kot haduh T.1600 klur. “Ngi la pynwandur ia kane ka project ha kata ka rukom ba ka Shnong, New Shillong, ka Administrative bad Knowledge City, kin ioh pahuh bha ia ka um ha kine ki 30-40 snem ban wan” ula ong.
Ka bynta ba nyngkong jong kane ka project ka kynthup ia ka jingshna ia ka top um kaba la mang haduh T. 600 klur. “Ngi ngeit ha ka jingiatreilang bad ki Shnong ki Thaw. Ngi la pyniadon bynta lang bad ki shnong ki thaw ha man ki prokram ne sienjam ba ngi shim ban nang pynsted ia ka roi ka par jong ka Jylla” ula ong.
Kiba la iadonlang ha kane ka sngi ki kynthup ia ka Myntri ka Koit ka Khiah Dr Ampareen Lyngdoh bad u Myntri ka Tnad Soil & Water Conservation Marcuise N Marak.
