Shillong, Naiwieng 19 : U Vice Chancellor In-charge ka North Eastern Hill University (NEHU) Prof N Saha ula pyntip ba ka skulbah ka lah ban pynkynriah noh shuwa ia ka eksam semester namar ka jingiakhih jong ki samla pule.
U pyntip ba kane ka eksam ka dei kaba la buh ban pynlong ha ka taiew ba nyngkong jong u Nohprah. U ong ba ia kane ka eksam lah ban pynkynriah noh sha u bnai Rymphang 2025.
“Ha kum kane ka jinglong jingman ba mynta, kan long kaba eh ban lah pynlong ia ka eksam semester kaba ju long ha ka taiew ba nyngkong u Nohprah” ula ong.
Ha kajuh ka por, u Prof Saha ula pyntip ba ka Inquiry Committee bala thung da ka skulbah, ka dei ban aiti mynta ka sngi ia ka kaiphod sha u (VC In-charge).
Ia kane ka kaiphod yn sa phah sha ka Inquiry Committee ki 2 ngut ki dkhot bala thung da ka Ministry of Education.
