Shillong, Nailar 30 : U Myntri ka tnad Pule Puthi Rakkam A Sangma ha ka sngi Thohdieng, ula pyntip ha Iingdorbar bay m lah satia ban nang pynbun ia ka jingpynrung klas ia ki nonghikai ban shah hikai pyntbit ha District Institute of Education and Trainng (DIET), Nongstoin kat kum ki kyndon ka National Council for Teacher Education (NCTE).
Hynrei ula kular ba ka Sorkar kan sa iakrne shen bad ka NCTE ba kan ai jingbit bad ban ai jingkyrshan song pisa.
Ula pyntip ia kane haba jubab ia ka jingiatai ia ka mat ba lyngkot bala wanrah da u MLA ka UDP na Mawkyrwat Bah Renikton Lyngdoh Tongkhar, uba la kyrpad ban nang pynbun ia ka jingdon ki seat ha DIET, Nongstoin, West Khasi Hills.
U Rakkam ula ong ba kat kum ka kyndon NCTE, ka jingpynrung klas (50 seat) ka dei ka bym lah ban kyntiew namar ka jingai jingbit ka dei tang na ka bynta ka shi unit (tang 50 seat) naduh ba ka sdang.
“Hnrei ngin sa shimkhia ban iakren bad ka NCTE ban ioh jingbit bad ka Ministry of Education ka Sorkar India ba kan ai jingiarap song pisa” ula kular.
U Myntri ula pyntip ba ka DIET Nongstoin ka dei kaba la ithuh da ka Ministry of Education (MOE) hapoh ka Samagra Shiksha Abhiyan kum kawei na ki DIET-Centre of Excellence (CoE) jong u snem 2024-25 bad da kane ka jingithuh, yn sa kyntiew kyrdan noh ia ka DIET, Nongstoin haba iadei bad ki jingtei lem bad kiwei kiwei ki jingdonkam.
U pyntip ba ka jingjied ia ki kyrtong kan shong eh ha ka jingpass bha jong ki bad ka jingai seat kan iaid kat kum ki Block khnang ba baroh ki block kin don ia ki nonghikai bala dep hikai pyntbit.
Ula ong ba kumba 30% jong ki seat la ai sha ki kyrtong kiba shim ia ka science bad mathematics haka kyrdan class XII.
