Shillong, Risaw 27: U Myntri ka tnat pynroi sor bah Sniawbhalang Dhar ula pyntip ba ka Sorkar Jylla kala mynjur ban pynkha ia ka Community & Rural Development (C&RD) Block ha Namdong bad ban kyntiew kyrdan ia ka Nartiang Primary Health Centre (PHC) sha ka Community Health Centre (CHC).
Une u Myntri u pyntip ia kane ha ka jingialang bad ka Mynsngat Khanduli Development Committee (MKDC).
Ia kane la iathuh da u president of MKDC Denis Dkhar uba la ong ruh ba ki paidbah ka thain Nartiang lyngba ka Committee ka ai khublei iaka sorkar synrop Meghalaya Democratic Alliance (MDA) bad ka ai khublei kyrpang ia u bah Sniawbhalang hadien ba ki paidbah ka thain kila ioh ia kaei kaba ki dawa.
Haba kren sha ki lad pathai khubor u bah Denis ula ong ba kine ki jingdawa ki long kiba la slem bha bad naka liang ka sorkar jylla kala shim khia bad dei namar kane ki paidbah ka thain Nartiang ki sngewnguh eh iaka sorkar bad iala u MLA.
“Haka jingiakynduh mynta ka sngi, u bah Sniawbhalang ula iathuh ba ka sorkar kala mynjur ban pynurlong iaka jingdawa ban pynkha ia ka Namdong CRD Block bad ban kyntiew kyrdan iaka Nartiang PHC shaka Nartiang CHC” la ong u bah Denis.
U bah Denis ula iathuh ruh ba haka jingiakynduh ia u MLA, ka komiti kala ioh jingtip baka sorkar kala mang haduh T. 47 klur naka bynta ban pyntreikam iaka skhim Jaal Jeevan Mission (JJM) naka bynta ka Namdong Circle.
