Shillong, Nailur 02 : U Myntri ka tnad Jngohkai pyrthei bah Paul Lyngdoh ha ka sngi Ba-ar, u la pyntip ba ka projek ban pynheh ia ka kad liengsuin ka Shillong kala iaid shakhmat, bad ka jingkhot tender kala dep bad la khmih lynti ba ka jingpyntrei ia ki kam, kan sdang noh shen.
“Ka projek Shillong Airport…kan sa long ka nongwanrah ia ki jingkylla bad wat mynta katba ngi dang iakren, ka jingkhot tender ka la iaid bad ka jingpyntrei kan sdang noh shen,” ong u Bah Paul haba ïakren bad ki nongthoh khubor.
“Ha ba kut jong u snem 2026 ngi kyrmen ba ka jingpynheh ia ka kad liengsuin ka Shillong ruh kan sa dep noh bad kane kan rah ia ka jingshem jong ki nongjngohkai pyrthei sha ka kyrdan kaba kham shalor,” u la ong.
U Bah Paul u la pynpaw ruh ba ka Shillong ka la shah jied kum ka jaka jngohkai pyrthei kaba la jied tam ha ka ri bad ong, “Ka dei ka jingjop kaba niar bha ban ioh na ka bynta ka jylla kaba dang hap ban don ïa ka kad liengsuiñ kaba treikam pura.”
Ka sorkar ka la pynbna ruh ia ka jingthmu ban wanrah ia ka jingshakri helicopter sha ki jaka jngohkai kiba pawnam, kynthup ha Umiam, Sohra, Dawki, Shillong, bad Mawsynram.
“Ka jingthmu jong ngi ka long ba ngin pynsted ia ki kam. Ngi la ia kren bad ka Aviation Ministry,” ong u Myntri.
