Shillong, Risaw 18: U MLA ka Jowai bah Wailadmiki Shylla ula kam ba kila don kumba 18-19 ngut ki trai jaka kiba la wan shakhmat ban ai jaka naka bynta ban pynlong jaka bret jaboh hynrei dei namar ka jingpyrshah ki paidbah bad ki sengbhalang haduh mynta ym lah ban ioh jaka thep nuit.
Haba kren sha ki lad pathai khubor u bah Wailad ula ong ba naka liang ka sorkar kala ithuh 3 tylli ki jaka ban pynylla jaka theh nuit hynrei namar ka jingpyrshah ki nongshong shnong, ka sorkar ruh kam lah ban iaid shakhmat ban tei jaka theh nuit.
U bah Wailad ula ong ka sorkar kala thaw daka Task Force Committee ban eksamin ia kine ki jaka hynrei namar ka jingpyrshah ki paidbah nong shong shnong ha kine ki jaka ka sorkar ruh ka hap ban pynsangeh noh shwa.
“Kim dei ki trai jaka ba pyrshah hynrei kidei ki paidbah nongshong shnong bad ki sengbhalang kiba pyrshah ha kawei ka jaka na ki 3 tylli ki jaka baka sorkar bad ki trai jaka kila iateh ban pylla jaka theh nuit” la ong u bah Wailad.
U bah Wailad ula ong ba iaka ba mynta ka sorkar kala don ka jingmut (Plan) kumno ban leh iaki nuit ba la lang ha Iew Musiang namar ym lah ban shu bret iaki jaboh hapoh Iew kaba dei ruh ka lad kamai jakpoh iaki paidbah ka thain.
Ula ong ruh ba mynta ka kynti ka long kaba eh iaka sorkar ne ki bor district ban wad jaka namar kan mih beit ka jingshah kynnoh ba ka don ka jingleh politik haba iadei bad ka jingioh jaka naka bynta ban pynkylla jaka theh nuit.
“Iaka ba mynta ka sorkar kala pynkhreh iaka buit kumno ban leh iaki jaboh ba wan bret ha Iew Musiang Jowai bad naka liang ka sorkar ka don ruh ka jingmut (Plan) ban weng iaki jait jaboh khnang ban pynsuk iaki nongkhat iaki jaboh na katei ka jaka” la ong u bah Wailad.
U bah Wailad ula ong ba naka liang ka sorkar kala pynkhreh katto katne ki jaka hapoh ka thain Jowai ban pyllang iaki jait nuit, ban weng ruh iaki nuit ba jhieh bad ba rynkhiang na man la ki longing bad na ki iew naka bynta ban leh iaka ba donkam.
