SHILLONG Risaw 18: Ka Hill State People’s Democratic Party (HSPDP) Mawkynrew konstitwensi kala pynbna u bah Martle N Mukhim kum u kyrtong ka party naka bynta ka ilekshon 2023.
Ia kane la pynbna ha ka jingialang jong ki nongialam, ki nongkitkam, ki nongtrei bad nongkyrshan jong ka HSPDP kiba hap hapoh ka Mawkynrew konstiwensi, kaba la pynlong ha Lad Kharang, Jongksha.
Haba kren ha kane ka sngi u bah Martle N Mukhim uba dei mynta u MDC ula ong ba ka jingshakri jong u ha ka kam paidbah kam duna shuh ia ka 50 snem namar la palat 25 snem ula ai ka jingshakri paidbah kaba khlem tulop bad 25 snem ka don ka jingshakri kaba ioh bad ka tulop.
U bah Martle ula ong ba ka HSPDP ka ieng haka nongrim trai ri trai muluk bad ka pyrshah jur ia kino kino ki ain ka sorkar kiba ktah iaka jinglong tynrai ki paidbah nongshong shnong ne ka jylla Meghalaya baroh kawei.
“Kum u kyrtong ka HSPDP, nga pyrshah jur ia ka jingpyntreikam ia ka Code of Criminal Procedure (CrPC) bad ka Code of Civil Procedure (CPC) bad ka Meghalaya Gambling Act ha kane ka jylla bad ngan iakhun tyngeh khnang ba ka sorkar jylla pynduh pyndam syndon ia kine ki ain” la ong u bah Martle.
U bah Martle ula kynnoh ruh ba sorkar synroplang ka Meghalaya Democratic Alliance (MDA) hapoh ka jingialam jong ka National Peoples’ Party (NPP) kadei ka sorkar kaba bamsap naduh khlieh haduh kjat bad ka kham palat ban ia ka sorkar Congress.
