Shillong, Naiwieng 02 : U Symbud Myntri Rangbah ka Jylla Bah Prestone Tynsong hynne ka sngi Balang, ula pynthikna ba ka Tnad Pulit kala kem ia u Assistant Inspector General of Police (A) barim Bah GK Iangrai haba pyntip ruh ba ka Tnad kala sospon ia une u Heh Pulit na ka kam.
“Ka Tnad Pulit kala kem ia une u Heh Pulit bad ka Ain mynta kan iaid la ka jong ka lynti” ong u Bah Prestone haba pyntip “Ngim don lad da kumwei pat hynrei ban sospon ia une u Heh Pulit ba shah kem”.
Haba kylli, u Bah Prestone ula ong “Khatduh hi ngi hap ailad ia ka Ain ba kan iaid haduh kaba kut bad ngin sa peit ia kaei kaba donkam ban leh”.
Kat kumka jingong jong u, kaei kaba ka Tnad Pulit ka leh ka dei kaba iaid kat kum ka lynti jong ka ain.
Halor ka jingdawa tohkit CBI ia kane ka kam jyrsieh, u Symbud Myntri Rangbah ula ong “Phi donkam ban sngewthuh ia kawei, namar ka Tnad kala leh ia kaba donkam (da kaba kem ia une u heh Pulit) bad mynta ka jingtohkit kala iaid….ai baka Tnad Pulit kan leh ia kaba donkam baroh”.
“Phi iohi ruh ba kane ka kam kaba don hapoh ka jingbishar ka Iingkashari ha kaba nga sngew ba baroh ki jingshisha kin sa mih lut” ula bynrap.
Ka kynhun tohkit Fact Finding Team bala khlieh da u Inspector General (Law & Order) Mukesh Kumar kala shem ia ka jing donkam u Bah Iangrai ha ka jingthied beain ia 29 tylli ki kali ha ka por ba u bat kum u Assistant Inspector-General of Police (Administration).
