Shillong, Naiwieng 2: Ka jingialehkai phutbol kan ioh ban plie pyrda ia ka lympung ialehkai 2nd North East Olympic Games 2022, ha kaba ki kynhun ialehkai kynthei bad shynrang na ka thain kin mih ban iakhun ha kane ka jingialehkai kaba paw nam eh jong ka thain.
Watla ia ka NEOG 2022 yn sa plie pyrda ha ka 10 tarik u Naiwieng, hynrei haba pyrkhat ia ki rang bad ki thei ialehkai bad ia ka jingdonkam jong ki ban ioh shongthait hapdeng ki sngi ba ialehkai, ka phutbol kan sdang noh naduh ka 7 tarik u Naiwieng, pyntip I Competition Manager Philarima Hynniewta.
Kin sa don ruh katto katne ki jingpynkylla hapoh ki madan ialehkai- ka MFA Turf ha madan Third Ground, Polo ha kaba yn pynieng ruh ia ki stand ba shipor nalor ka jingwanrah ia ki hynriew tylli ki floodlights jong ka SSA Stadium sha kane ka madan khnang ban ioh pynialehkai ia bun tylli ki jing ialehkai namar ka jingkem dum kloi ka bneng bala wan ka tlang.
Na ka bynta ki nongialehkai, ia ki jaka bujli jain la dep ban maramot pura, khublei shibun ia ka jing kyrshan ka Sorkar Jylla, kaba kwah ban pynlong ia kane ka lympung kaba biang eh na ka bynta ka Jylla bad ki nongwan ialehkai ba nabar.
Ha ka NEOG 2022, ka jingialehkai phutbol kan kynthup ia ka U-21 ki shynrang bad U-17 ki Kynthei.
Ha ka jingialehkai ki Shynrang, ka Manipur, Mizoram, Tripura bad Assam kin don ha ka Group 1 bad ka Meghalaya, Nagaland, Arunachal Pradesh bad ka Sikkim kin don ha ka Group 2.
Ka Meghalaya ka don ruh ha ka group 2 ha ka jingialehkai ki kynthei nalor ka Mizoram, Arunachal Pradesh bad Sikkim katba ka Manipur, Assam, Tripura bad Nagaland ki don ha ka Group 1.
U Coach ka kynhun ialehkai ki shynrang Bah Khlain Pyrkhat Syiemlieh ula khmih lynti ia ka jingiakhun kaba iakhaid bha na baroh ki Jylla khamtam ka Mizoram bad ka Manipur kiba kham paw bha.
“Ka Nagaland ruh kam dei ka Jylla kaba lah ban khein troin namar ka dei ka kynhun U-17 shynrang kaba la jop ia ka Subroti Cuo ha u Risaw bad katto katne na kine ki rang ialehkai ki lah ban don ha ka kyndon U-21 ruh” ong u Bah Khlain.
Saw snem mynta, ka Jylla Meghalaya kala jop ia ka tamka rnong ha ka jingialehkai ki shynrang bad duh takma ha ka jingialehkai ki kynthei namar ka jingwan ha ka kyrdan ba saw.
“Ka Meghalaya ka don ia ka kabu ha kane ka kynti hynrei ki don ruh katto katne na ki nongialehkai kiba mynsaw, namar kata, ngi hap ban ap ia ki. Ngi kyrmen skhem ba kin koit noh ha ka por kaba biang” ong u Coach.
