Shillong, Rymphang 24 : U Symbud Myntri Rangbah ba khmih ia ka Tnad PWD, Bah Prestone Tynsong ula pyntip ha Iingdorbar Thaw Ain ba ka jingiapynbeit ia ka jingiakajia halor ka jaka ba 600 meter jongka surok Happy Valley-Mawshbuit kala jan dep artad. Kane ka jaka ka hap hapoh ka jaka shipai.
“Ai ba ngan pyntip ia ka Iingdorbar ba ka jingiapynbeit kala jan poi sha kaba kut. Hynnin ka sngi, u Myntri Rangbah ka Jylla ula khot ia ka jingialang ha kaba ki borkhmih ka GTC bad ki Ophisar ka Tnad Defence bad ki Ophisar ka Sorkar Jylla kila iashimbynta. Nga sngewkmen ban pyntip ba ha kane ka jingialang, ki bor shipai kila mynjur ban nym pynthut lane pynsangeh ia ka jingiaid ki kali kiba leit ne mih na shnong Mawshbuit” ong u Bah Prestone haba jubab ia ka jingkylli bala wanrah da u MLA ka Mawryngkneng Bah Heaving Stone Kharpran.
“Shen ngin sa ioh ia ki mat ba iakren jong ka jingialang bad hadien bala iasoi, yn sa pynmih ia ka jing bthah ba donkam sha ka bor district ban pynthikna ba ym dei ban pynthut ia ka leit ka wan ki kali na kane ka Shnong” ula bynrap.
U Bah Prestone u pyntip ba ki bor District bad ka Directorate of Records kin sa leh sorjamin biang ia ka jaka na ka bynta ban shna ia ka surok sha Mawshbuit.
“Kumba nga la dep ong ba ki dulir jaka kila don. Hynnin ruh ngi lah rai ban leh sorjamin biang khnang ban pynthiknaba baroh kin iashai lut halor kane ka kam. Ngi la bthah ia ka bor district bad ka Tnad Land Record and Survey ba kin leh sorjamin ba bniah bad ngin sa iapeit kumno ka long”.
Kat kum ka jingong jong u, ka jingpynbna ia kane ka bynta jong ka surok ka shong ha ki bor shipai.
U Bah Prestone u pyntip ruh ba ka District Collection kan sa pynlong ia ka jingiajurip lang bad ki bor shopai halor ka jingshna ia ka jingkieng ha Wah Umkhen hadien ka jingpyntip ba pynthut ki shipai.
“Hooid ngi la ioh jingtip halor kane ka jingjia bad sa shisien kane ka jaka namar katto katne ki bynta jong ka jaka ka hap haka jingkhmih ki shipai” ong u Bah Prestone.
Halor ka jingiakam trai ia ka jaka, u Symbud Myntri Rangbah ula ong “Ia ki dulir khyndew jong ki bor shipai yn sa wanrah hapoh ka Iingdorbar bad nga kyrmen ba ka jingshai kan sa mih na kine ki kot”.
U Bah Prestone u bynrap ba ha ka jingialang ba long mynshemsnem, ula kren shai sha ki nongshong shnong ba ka jingkam trai ia ka jaka ka dei ka kam ka bym lah ban long, hynrei ula kular ba ka jingiaid jong kikali kam dei ban shah ktah la ka dei kiba mih ne leit sha shnong Mawshbuit”.
